သယံဇာတကော်မတီအတွင်းရေးမှူး လုပ်ကြံခံရမှု NUG ဖော်ထုတ် အရေးယူမည်

စစ်ကိုင်းတိုင်း၊ အမျိုးသားညီညွတ်ရေးအစိုးရ (NUG)၊ သယံဇာတနဲ့ သဘာဝပတ်ဝန်းကျင် ထိန်းသိမ်းရေး ဝန်ကြီးဌာနလက်အောက်က ကောလင်းမြို့နယ် သယံဇာတကော်မတီအတွင်းရေးမှူး ဦးအရိန္ဒမာ မတရား လုပ်ကြံသတ်ဖြတ်ခံခဲ့ရတာနဲ့ ပတ်သက်လို့ အမိန့်ပေးစေခိုင်းသူတွေနဲ့ ကျူးလွန်သူတွေကို ဖော်ထုတ်ပြီး ထိထိရောက်ရောက် အရေးယူမယ်လို့ NUG က ဇန်နဝါရီလ ၄ ရက်မှာ ကြေညာချက် ထုတ်ပြန်လိုက်ပါတယ်။

အမှန်တရားဘက်ကနေ ရပ်တည်ပြီး တိုင်းပြည်နဲ့ ဒေသကောင်းကျိုးအတွက် ကိုယ်ကျိုးမဖက်ဘဲ တိတိကျကျ အဂတိကင်းကင်းလုပ်နေတဲ့ ဦးအရိန္ဒမာကို လူပုဂ္ဂိုလ်တစ်ဦးတစ်ယောက် ဒါမှမဟုတ် တစ်စုတစ်ဖွဲ့ကဖြစ်စေ လုပ်ကြံသတ်ဖြတ်တာကို ကန့်ကွက်ရှုတ်ချတယ်လို့လည်း ဆိုပါတယ်။

ဇန်နဝါရီလ ၂ ရက် မွန်းလွဲ ၂ နာရီလောက်မှာ ကောလင်းမြို့နယ် ရွှေတွင်းနဲ့ ရှမ်းကလုံးကျေးရွာအစပ်မှာ ဦးအရိန္ဒမာ မတရားလုပ်ကြံသတ်ဖြတ်ခံခဲ့ရတာလို့ NUG သယံဇာတဝန်ကြီးဌာန ကြေညာချက်မှာ ပါရှိပါတယ်။

NUG သယံဇာတဝန်ကြီးဌာနအတွက် တန်ဖိုးမဖြတ်နိုင်တဲ့ ပြည်သူ့ဝန်ထမ်းကောင်းတစ်ယောက် ဆုံးရှုံးရတာဖြစ်ပြီး ကျန်ရစ်သူမိသားစုနဲ့ ထပ်တူလွန်စွာကြေကွဲဝမ်းနည်းရတယ်လို့လည်း ဖော်ပြပါတယ်။

အစောပိုင်းမှာ ဆိုင်ကယ်မတော်တဆမှုကြောင့် သေဆုံးတယ်လို့ သတင်းရခဲ့ပေမဲ့ စုံစမ်းစစ်ဆေးတဲ့အခါ သေနတ်ပစ်ခံရတဲ့အကြောင်း NUG သယံဇာတဝန်ကြီး ဒေါက်တာ တူးခေါင်က သူ့လူမှုကွန်ယက်မှာ ဇန်နဝါရီလ ၂ ရက်နေ့က ရေးသားပါတယ်။

ဦးအရိန္ဒမာဟာ အကြမ်းမဖက် အာဏာဖီဆန်ရေးလှုပ်ရှားမှု (CDM) အရာရှိတစ်ယောက်ဖြစ်ပြီး သေဆုံးချိန်မှာ သမီးတစ်ယောက် ကျန်ခဲ့ပါတယ်။