NCA မှာ အားလုံးပါဝင်နိုင်ရေး အစိုးရနဲ့ တပ်မတော် လမ်းဖွင့်ပေးဖို့ KNU တောင်းဆို

အစိုးရနဲ့ အပစ်ခတ်ရပ်စဲရေးစာချုပ် NCA မှာလက်မှတ်ရေးထိုးထားတဲ့အဖွဲ့တွေက စီစဉ်တဲ့ လူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲကို ကရင်ပြည်နယ်က စတင်ကျင်းပတာ ဖြစ်ပါတယ်။

တိုင်းရင်းသားလက်နက်ကိုင်အဖွဲ့တွေနဲ့ တပ်မတော်အကြား သံသယစိတ်တွေမထားဘဲ ယုံကြည်မှုနဲ့ ငြိမ်းချမ်းရေးကို တည်ဆောက်ကြဖို့ ဆွေးနွေးပွဲကို တက်ရောက်လာတဲ့ အရှေ့တောင်တိုင်းစစ်ဌာနချုပ် တိုင်းမှူး ဗိုလ်ချုပ်မျိုးဝင်း က တိုက်တွန်းခဲ့ပါတယ်။

ဆွေးနွေးပွဲကို ကရင်ပြည်နယ်အစိုးရအဖွဲ့၊ ကရင်တိုင်းရင်းသားလက်နက်ကိုင်အဖွဲ့တွေ၊ ကရင်နိုင်ငံရေး ပါတီတွေ၊ မွန် တနင်္သာရီ ရန်ကုန် ပဲခူး ဧရာဝတီ စတဲ့ တိုင်းနဲ့ ပြည်နယ်တွေက ကရင်တိုင်းရင်းသား ကိုယ်စားလှယ်တွေ၊ အရပ်ဖက် အဖွဲ့တွေ၊ ပြည်ထောင်စု ငြိမ်းချမ်းရေးကော်မရှင်အဖွဲ့ဝင်တွေ စုစုပေါင်း ကိုယ်စားလှယ် ၇၀၀ လောက် တက်ရောက်ဆွေးနွေးနေတာဖြစ်ပါတယ်။

NCA စာချုပ်အရ လူမျိုးအလိုက်၊ ဒေသအလိုက်နဲ့ အကြောင်းအရာအလိုက် အမျိုးသားအဆင့် နိုင်ငံရေးဆွေးနွေး ပွဲတွေကို ကျင်းပရမှာဖြစ်ပြီး ပထမဆုံးအကြိမ်အဖြစ် လူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲကို ဘားအံမြို့မှာ ၃ ရက်ကြာ ကျင်းပတာဖြစ်ပါတယ်။

ဆွေးနွေးပွဲကနေ ကရင်လူမျိုးစုအဆိုပြုချက်တစ်ရပ် ထွက်ရှိလာမှာဖြစ်ပြီး အဲဒီအဆိုပြုချက်ကို လာမယ့် ဖော်ဖော် ဝါရီလမှာကျင်းပမယ့် ဒုတိယအကြိမ် ပြည်ထောင်စု ငြိမ်းချမ်းရေး ညီလာခံမှာ တင်သွင်းမှာဖြစ်တယ်လို့ သိရပါတယ်။