မြစ်ဆုံစီမံကိန်း ပြန်လည်သုံးသပ်ဖို့ (၁၀) ပါတီ အဖွဲ့ တိုက်တွန်း

ဧရာဝတီမြစ်ကမ်းမှ မြင်ကွင်း တခု။

ကချင်ပြည်နယ်မှာ တည်ဆောက်နေတဲ့ ဧရာဝတီ မြစ်ဆုံ ရေအားလျှပ်စစ် စီမံကိန်းဟာ တစ်နိုင်ငံလုံးနဲ့ ပတ်သက်နေတဲ့ အပြင် အလွန် အရေးကြီးတဲ့ စီမံကိန်းကြီး ဖြစ်တယ်လို့ ယူဆတာကြောင့် ဒီစီမံကိန်းနဲ့ ပတ်သက်ပြီး အများပြည်သူတွေ သိရှိသင့်တယ်လို့ ယူဆတဲ့အတွက် အခုလို တောင်းဆိုတာ ဖြစ်ကြောင်း ပြည်ထောင်စု ဒီမိုကရေစီပါတီ ယူဒီပီ ဥက္ကဌ ဦးသိန်းတင်အောင်က ပြောပါတယ်။

အကျိုးသက်ရောက်မှှု ကြီးမားမှာ ဖြစ်တဲ့အတွက် သီးခြားလွတ်လပ်တဲ့ ဆိုင်ရာ ပညာရှင်တွေနဲ့ အချက်အလက်တွေ ပြည့်စုံအောင် စနစ်တကျ ရယူပြီး ပြည်သူတွေကိုလည်း ကြိုတင် သတိပေးဖို့၊ စုံစမ်းစစ်ဆေးပြီး ဆက်လက်ဆောင်ရွက်သင့် မသင့်လေ့လာရန် တောင်းဆိုတာ ဖြစ်ကြောင်း ဦးသိန်းတင်အောင်က ပြောပါတယ်။

ဒါ့အပြင် နိုင်ငံမှာ အမျိုးသား ပြန်လည်သင့်မြတ်ရေး အမြန်ဆုံး ပေါ်ပေါက်လာဖို့ အတွက် ဦးသိန်းစိန် အစိုးရအနေနဲ့ နိုင်ငံရေး အယူအဆ မတူသူတွေနဲ့ ပူးပေါင်း ဆောင်ရွက်တာတွေ၊ တွေ့ဆုံ ဆွေးနွေးတာတွေ အပြင် ယုံကြည်ချက်ကြောင့် အကျဉ်းကျနေတဲ့ နိုင်ငံရေး အကျဉ်းသားတွေကို အမြန်ဆုံးလွှတ်ပေးဖို့ ပထမခြေလှမ်း အဖြစ် လုပ်ဆောင်သင့်ကြောင်းလည်း တိုက်တွန်းထားပါတယ်။

ဒီမိုကရေစီ မိတ်ဆွေ ၁၀ ပါတီ အဖွဲ့ရဲ့ ဒီကြေညာချက်တွေ တိုက်တွန်းချက်တွေအကြောင်း ဒေါ်ခင်ခင်အိ စုစည်းတင်ပြထားတာကိုလည်း နားဆင်နိုင်ပါတယ်။

	ဆက်သွယ်မေးမြန်းချက်။
	အသံဖိုင်ယူရန်။