မြိုင်မှာ ဗုံးကြဲတိုက်ခိုက်ခံရမှု သေဆုံးသူ ၁၂ ဦးအထိရှိလာ

မကွေးတိုင်း၊ မြိုင်မြို့နယ်၊ ဆုံကုန်းရွာမှာ ဖေဖော်ဝါရီလ ၂၅ ရက်နေ့က ပြည်သူ့ကာကွယ်ရေး တပ်ဖွဲ့ဝင်တစ်ဦးရဲ့ မင်္ဂလာပွဲကျင်းပချိန် စစ်ကောင်စီတပ်က ဗုံးကြဲတိုက်ခိုက်တာကြောင့် သေဆုံးသူ ၁၂ ဦးအထိရှိလာပြီလို့ ဒေသခံတွေနဲ့ ပြည်သူ့ကာကွယ်ရေးအဖွဲ့က RFA ကို ပြောပါတယ်။

ထိခိုက်ဒဏ်ရာရသူ ၂၂ ဦးရှိပြီး သူတို့ကို ဆေးကုသမှုပေးနေတယ်လို့ မြိုင်မြို့နယ် ပြည်သူ့ကာကွယ်ရေးအဖွဲ့ တာဝန်ခံ ဗိုလ်လက်ျာက RFA ကို ဖေဖော်ဝါရီလ ၂၆ ရက်နေ့မှာ ပြောပါတယ်။

“ဒေသခံတွေကတော့ ထွက်ပြေးကြတယ်၊ အခုထိတော့ သေဆုံးတာ ၁၂ ဦးရှိပြီ။ အဲဒီထဲက တစ်ဦးကတော့ မီးလောင်နေတဲ့ အထဲကနေ ကောက်ရတာဆိုတော့ နာမည် မသိနိုင်သေးဘူး။ ဒဏ်ရာရတဲ့သူတွေကိုလည်း ဆေးကုနေရတယ်"

သေဆုံးသူတွေဟာ အသက် ၂၉ အရွယ် ကိုဇော်နိုင်၊ အသက် ၂၇ နှစ်အရွယ် ကိုကျော်သူ၊ အသက် ၂၅ နှစ်အရွယ် ကိုကျော်မျိုးဝင်း၊ အသက်၄၉ နှစ်အရွယ် ဦးဖိုးရွှေ၊ အသက် ၅၃ နှစ်အရွယ် ဦးမောင်ကြိုင်၊ အသက် ၃၁ နှစ်အရွယ် ကိုဝေလင်းမောင်၊ အသက် ၃၆နှစ်အရွယ် ကိုခန့်ဝင်း၊ အသက် ၄၄ နှစ်အရွယ် ကိုသောင်းဝင်း၊ အသက် ၅၈ နှစ်အရွယ် ဒေါ်သိန်းမြင့်၊ အသက် ၃၄ နှစ်အရွယ် ကိုသံချောင်း၊ အသက် ၄၉ နှစ်အရွယ် ကိုကံဌေးတို့ဖြစ်ပြီး နာမည်မသိရသေးတဲ့ ပုံပျက်နေတဲ့ ရုပ်အလောင်းတစ်ခု ပါဝင်တယ်လို့ ဆိုပါတယ်။

စစ်ကောင်စီတပ် ဗုံးကြဲတာကြောင့် အရပ်သားတွေ ထိခိုက်သေဆုံးရတာနဲ့ ပတ်သက်လို့ တုံ့ပြန်ချက်ရဖို့ စစ်ကောင်စီရဲ့ မကွေးတိုင်း ပြောခွင့်ရသူ တိုင်းလူမှုရေးဝန်ကြီး ဦးမျိုးမြင့်ကို RFA က ဆက်သွယ်ခဲ့ပေမဲ့ လက်ခံဖြေကြားတာ မရှိပါဘူး။

စစ်ကောင်စီတပ် ထောက်ခံတဲ့ တယ်လီဂရမ် စာမျက်နာတွေမှာ ဆုံကုန်းရွာ PDF အဖွဲ့ရဲ့ မင်္ဂလာဆောင်ကို လေကြောင်းကနေ ဗုံးကြဲတိုက်ခိုက်တာမှန်ကန်ပြီး PDF အများအပြား သေဆုံးတယ်လို့ ဖေဖော်ဝါရီလ ၂၅ ရက်နေ့က ရေးသားဖြန့် ဝေကြပါတယ်။

RFA ရဲ့ အချက်အလက်တွေအရ ပြီးခဲ့တဲ့ ၂၀၂၄ ခုနှစ်အတွင်း စစ်ကောင်စီတပ်ရဲ့ လေကြောင်းနဲ့ လက်နက်ကြီးကြောင့် နိုင်ငံတစ်ဝန်းမှာ အရပ်သား ၁၇၆၉ ဦး သေဆုံးခဲ့ပါတယ်။