မူဆယ်မြို့မှာ ဈေးဆိုင် နဲ့ နေအိမ်တွေ ပိတ်

တရုတ်-မြန်မာနယ်စပ် ရှမ်းပြည်မြောက်ပိုင်း မူဆယ်မြို့ကို တိုက်ခိုက်မှုတွေ ပြုလုပ်မယ်ဆိုတဲ့ သတင်းတွေ ထွက်ပေါ်နေတဲ့အတွက် ဒီနေ့ နေ့လည် ၁၁ နာရီဝန်းကျင်ကစပြီး မူဆယ်မြို့ပေါ်က ဈေးဆိုင်တွေနဲ့ နေအိမ်တွေ အားလုံးပိတ်ထားကြပြီး ညနေပိုင်းမှာ မြို့ပေါ်အခြေအနေ ပြန်လည်တည်ငြိမ်နေတယ်လို့ မူဆယ်မြို့ခံတွေ က ပြောပါတယ်။

လက်ရှိမှာ အုပ်ချုပ်ရေးအဖွဲ့က ဒေသန္တရညွှန်ကြားချက်တစ်စုံတရာ ထုတ်ပြန်တာမရှိသေးပေမယ့် စိုးရိမ်နေကြ တာဖြစ်တယ်လို့ မူဆယ်မြို့မှာ နေထိုင်တဲ့ ဦးနော်ဘောက် က ပြောပါတယ်။

"မြို့ကတိတ်ဆိတ်ပြီးတော့ လူတွေကလည်းကြောက်လန့်ပြီးတော့ ဟိုဖက်ပြေးကြဆိုတော့ မြို့တိတ် ဆိတ်နေတာပေါ့၊  ဒေသန္တရညွှန်ကြားချက်တော့ မထုတ်သေးပါဘူး၊ ကိုယ့်အိမ်မှာကိုယ် အေးဆေးနေကြပါ၊ စိုးရိမ်စရာမရှိဘူးအော်တာကို တချို့ဗမာတွေက နားမလည်တော့ပြေးလွှားကြတာပါ"