မူဆယ်မြို့မှာ ပေါက်ကွဲမှု ဆက်တိုက်ဖြစ်

တရုတ် မြန်မာ နယ်စပ် မူဆယ်မြို့မှာ စနေနေ့ည သန်းခေါင်အချိန်က ဗုံး ၅ လုံးထက်မနည်း ဆက်တိုက် ပေါက်ကွဲခဲ့ပေမဲ့ ထိခိုက်ဒဏ်ရာရသူ မရှိဘူးလို့ သိရပါတယ်။ ဗုံးများ ပေါက်ကွဲတဲ့ ပုံစံအရ ချိန်ကိုက်ဗုံးများ ဖြစ်နိုင်တယ်လို့ မူဆယ်မြို့ခံတွေက ပြောပါတယ်။

2012.06.10
border-china-305.jpg တရုတ်-မြန်မာနယ်စပ် ကျယ်ဂေါင်-မူဆယ် နယ်စပ်ဂိတ်တံခါး ကို တရုတ်နိုင်ငံဘက်က မြင်ရစဉ်
AFP

ဗုံးကွဲချိန်ဟာ ညသန်းခေါင်အချိန် ဖြစ်တာမို့ အိပ်မောကျနေသူများပြီး တချို့က ပေါက်ကွဲသံ ၆ ချက်ကြားရတယ်လို့ ပြောပါတယ်။ မူဆယ်မြို့ခံတဦးက အခုလိုပြောပါတယ်။

"မနေ့ည ၁၂ နာရီ ဝန်းကျင် ဆက်တိုက်ပေါက်တာလေ။ ရဲကင်းရှေ့ရယ်၊ ကွင်းနောက်ကျောရယ်၊ မူဆယ် ငွေလှိုင်းလက်ဖက်ရည်ဆိုင်ရှေ့နား စတဲ့နေရာတွေမှာ ၆ လုံးလောက် ပေါက်တယ်။"

ဒီဗုံးကွဲမှုနဲ့ ပတ်သက်ပြီး ဘယ်သူတာဝန်ရှိတယ် ဆိုတာတော့ မသိရသေးဘူးလို့ မူဆယ်မြို့ခံတွေကပြောပါတယ်။ ပြီးခဲ့တဲ့ အပတ်အတွင်း လားရှိုး-မူဆယ် ကားလမ်းကို KIA တပ်တွေက ယာဉ်သွားလာခွင့်ပိတ်မယ်ဆိုတဲ့ သတင်းတွေ ထွက်ပေါ်လာပြီးနောက် ဗုံးကွဲခဲ့တာ ဖြစ်ပါတယ်။

မူဆယ်မြို့မှာ ၂၀၀၉ ခုနှစ်က ကိုးကန့်ဒေသမှာ အစိုးရတပ်တွေက ဝင်ရောက်သိမ်းပိုက်စဉ် မူဆယ်မြို့ရဲကင်းစခန်းတခုအနီး ညသန်းခေါင်အချိန်မှာ အခုလို ဗုံးဆက်တိုက်ကွဲတာမျိုး ဖြစ်ခဲ့ဖူးတယ်လို့ မြို့ခံတွေက ပြောပါတယ်။

ဆက်နွယ်သောသတင်းများ
သတင်းများ
မှတ်ချက်ပေးပို့ရန်

မှတ်ချက်များကို အောက်ပါ ပုံစံတွင် ရေးသားနိုင်ပါသည်။ RFA ၏ အသုံးပြုခြင်းဆိုင်ရာ စည်းမျဉ်းစည်းကမ်းများနှင့် အညီ လိုအပ်လျှင် တည်းဖြတ်ပြီး ဖော်ပြပါမည်။ မှတ်ချက်များကို ရေးပြီးပြီးချင်း ချက်ခြင်း မြင်ရမှာ မဟုတ်ပါ။ တင်ပြထားသော မှတ်ချက်ပါ အကြောင်းအရာများ အတွက် RFA မှာ တာဝန်မရှိပါ။ ကျေးဇူးပြု၍ တခြား မှတ်ချက်ရေးသူများ၏ အမြင်ကို လေးစားပြီး အကြောင်းအရာကိုသာ အဓိကထား ရေးသားစေလိုပါသည်။