မင်းကွန်း အကယ်ဒမီကျောင်းမှာဖြစ်ခဲ့တဲ့ကိစ္စ သတင်းစာရှင်းလင်း

စစ်ကိုင်းမြို့ မင်းကွန်းအကယ်ဒမီကျောင်းမှာ ဖြစ်ခဲ့တဲ့ ဘာသာရေးကိစ္စနဲ့ ပတ်သက်ပြီး ခရစ်ယာန်တရားဟော ဆရာက ကျောင်းကနေ ခွင့်ပြုထားတာတက် ကျော်လွန်လုပ်ဆောင်ခဲ့တာဖြစ်တယ်လို့ အကယ်ဒမီကျောင်းမှာ ဒီနေ့ပြုလုပ်တဲ့ သတင်းစာရှင်းလင်းပွဲမှာ ကျောင်းအုပ်ဆရာတော် ဦးဥက္ကဋ္ဌ က မိန့်ကြားပါတယ်။

ခရစ်ယာန်တရားဟောဆရာ ဦးအောင်ထွန်းဦးဟာ ဒီဇင်ဘာလ ၈ ရက်နေ့မှာ စစ်ကိုင်းမြို့ အကယ်ဒမီ ပညာရေးကျောင်းမှာ ခရစ်စမတ် အထိမ်းအမှတ်အနေနဲ့ ပွဲတစ်ခု လာရောက်ပြုခဲ့ရာမှာ သာမဏေနဲ့ သီလရှင် အပါအဝင် ကျောင်းသူ ကျောင်းသားတွေကို လက်အုပ်ချီပြီး ခရစ်ယာန်ဘာသာ အမှတ်အသားတွေအတိုင်း ဆုတောင်းတာတွေကို ပြုလုပ်ခိုင်းခဲ့ပါတယ်။

ကျောင်းအုပ်ဆရာတော် ဦးဥက္ကဋ္ဌက အဟာရဒါန ကျွေးမွေးလှူဒါန်းခွင့်၊ လက်ဆောင်ပစ္စည်းပေးအပ်လှူဒါန်းခွင့်နဲ့ စုပေါင်းပြီး သီဆိုတီးမှုတ်ခွင့်ကိုပဲ ခွင့်ပြုခဲ့တာဖြစ်တယ်လို့ မိန့်ပါတယ်။