မင်းတပ်မှာ လေကြောင်းတိုက်ခိုက်မှုကြောင့် တစ်လအတွင်း လူငါးဦးသေဆုံး၊ ၃၁ ဦး ဒဏ်ရာရ

ချင်းပြည်နယ် မင်းတပ်မြို့နယ်မှာ စစ်ကောင်စီတပ်ရဲ့ လေကြောင်းတိုက်ခိုက်မှုကြောင့် ဧပြီလ တစ်လအတွင်း ဒေသခံငါးဦး သေဆုံးပြီး နောက်ထပ် ၃၁ ဦး ဒဏ်ရာရခဲ့တယ်လို့ CDF Mindat က မေလ ၃ ရက်နေ့မှာ ထုတ်ပြန်ပါတယ်။

သေဆုံး၊ ထိခိုက်မှုတွေအပြင် ဆေးရုံတစ်ခု၊ ခရစ်ယာန်ဘုရားကျောင်း နှစ်ကျောင်း၊ စာသင်ကျောင်းတစ်ခုနဲ့ လူနေအိမ် စုစုပေါင်း ၂၄ လုံး ပျက်စီးခဲ့တယ်လို့ ဆိုပါတယ်။

မေလ ၁ ရက်နေ့မှာလည်း မင်းတပ်မြို့နယ် တိုက်နယ်အမှတ် (၂) က ရွာတွေကို စစ်ကောင်စီတပ်က လေကြောင်း ကနေ ဗုံးကြဲတိုက်ခိုက်မှုတွေဆက်ရှိနေပြီး လူနေအိမ်တွေ ထိခိုက်ပျက်စီးခဲ့တယ်လို့ ဒေသခံတွေက ပြောပါတယ်။

ဒီအခြေအနေတွေနဲ့ပတ်သက်လို့ တုံ့ပြန်ချက်ရနိုင်ဖို့ စစ်ကောင်စီရဲ့ ချင်းပြည်နယ်ပြောခွင့်ရသူ ပြည်နယ်အတွင်းရေးမှူး ဦးအောင်ချိုကို RFA က တယ်လီဖုန်းနဲ့ ဆက်သွယ်မေးမြန်းခဲ့ပေမယ့် လက်ခံဖြေဆိုတာ မရှိပါဘူး။

အာဏာသိမ်းကာလ သုံးနှစ်ကျော်အတွင်းမှာတော့ မင်းတပ်မြို့နယ်ထဲမှာ စစ်ကောင်စီတပ်ရဲ့ တိုက်ခိုက်မှုတွေကြောင့် အရပ်သား နှစ်ဆယ်ကျော် သေဆုံးပြီး ၅၆ ဦးထက်မနည်း ဒဏ်ရာရခဲ့တယ်လို့ CDF-မင်းတပ်က ပြောဆိုထားပါတယ်။