စစ်ကောင်စီကို အာဆီယံအစည်းအဝေး တက်ခွင့်မပြုဖို့ မလေးရှားကန့်ကွက်မည်

မြန်မာနိုင်ငံမှာ ဒီမိုကရေစီရေးလှုပ်ရှားသူလေးဦးကို စစ်ကောင်စီက ကွပ်မျက်လိုက်တဲ့အပေါ် တုံ့ပြန်တဲ့အနေနဲ့ အာဆီယံအစည်းအဝေးတွေကို မြန်မာစစ်ကောင်စီ တက်ရောက်မှာကို ကန့်ကွက်သွားမယ်လို့ မလေးရှားနိုင်ငံခြားရေးဝန်ကြီး Saifuddin Abdullah က ဇူလိုင်လ ၂၆ ရက် ဒီနေ့ ပြောလိုက်ပါတယ်။

မြန်မာနိုင်ငံဆိုင်ရာ ကုလသမဂ္ဂအထူးကိုယ်စားလှယ် Noeleen Heyzar နဲ့ ကွာလာလမ်ပူမှာ ဒီနေ့တွေ့ဆုံဆွေးနွေးပြီးနောက် ပြုလုပ်တဲ့ သတင်းစာရှင်းလင်းပွဲမှာ အခုလို ပြောလိုက်တာပါ။

အာဆီယံဝန်ကြီးအဆင့်အစည်းအဝေးတွေမှာ မြန်မာစစ်ကောင်စီရဲ့ နိုင်ငံရေးကိုယ်စားလှယ် တက်ရောက်ခွင့်မပြုသင့်ကြောင်း မလေးရှားအစိုးရအဖွဲ့အစည်းအဝေးက ဆုံးဖြတ်ထားတယ်လို့ Saifuddin Abdullah က ပြောပါတယ်။

ဒါဟာ နိုင်ငံရေးအရ ကိုယ်စားပြုမှုနဲ့ ပတ်သက်လာရင် မိမိတို့ ဘယ်လောက်အလေးအနက်ထားသလဲဆိုတာ ပြသဖို့ဖြစ်တယ်လို့ Saifuddin Abdullah က ပြောပါတယ်။ သေဒဏ်ကွပ်မျက်တဲ့လုပ်ရပ်ဟာ မြန်မာ့အရေး အာဆီယံဘုံသဘောတူညီချက် ငါးချက်ကို စစ်ကောင်စီက မထီမဲ့မြင်သရော်လိုက်တာလို့ မိမိတို့ရှုမြင်‌ကြောင်းလည်း ပြောပါတယ်။

ကုလသမဂ္ဂအထူးကိုယ်စားလှယ် Noeleen Heyzar နဲ့တွေ့ဆုံရာမှာ အာဆီယံဘုံသဘောတူညီချက် ငါးချက်၊ မြန်မာ့အရေးအဆုံးသတ်ဖြေရှင်းဖို့ မူဘောင်ကိစ္စ၊ ဒုက္ခသည်တွေအတွက် လူသားချင်းစာနာမှု အကူအညီပေးရေးနဲ့ ပညာရေးကိစ္စတွေကို ဆွေးနွေးခဲ့ကြတယ်လို့ မလေးရှားနိုင်ငံခြားရေးဝန်ကြီးSaifuddin Abdullah ရဲ့ Twitter လူမှုစာမျက်နှာမှာ ဖော်ပြထားပါတယ်။