အသံချဲ့စက်သုံးမှုကြောင့် တရားစွဲခံရပြီး ရုံးတက်နေရ

• 
  2012-10-19

နာမည်ကျော် မဇ္ဈိမလှိုင်း တေးဂီတအဖွဲ့က ဂီတပညာရှင် ကိုရဲလွင် ဦးဆောင်တဲ့ ပန်းရဲ့လမ်း လူမှုကွန်ယက် အဖွဲ့ကနေ ဧရာဝတီတိုင်း ရေဘေး ဒုက္ခသည်တွေအတွက် မကွေးတိုင်း အလှူခံ ခရီးစဉ်အတွင်းမှာ  မကွေးမြို့က ဦးမောင်မောင်စိုးက အကူအညီပေးခဲ့တာကို  မကွေးမြို့နယ်အုပ်ချုပ်ရေး မှူးက ခွင့်ပြုချက်မယူဘဲ ပြုလုပ်ခဲ့တာဆိုပြီး တရားစွဲဆိုခဲ့တာပါ။

မကွေးမြို့နယ်အုပ်ချုပ်ရေးမှူးက ရပ်ကွက်ကျေးရွာ အုပ်ချုပ်ရေး အက်ဥပဒေ ပုဒ်မ ၂၆/၂၇ အရ တရားစွဲဆိုထားတာလို့ ဦးမောင်မောင်စိုးရဲ့ ရှေ့နေ ဒေါ်မိမိခင်က RFAကို အခုလို ပြောပါတယ်။

" ၂၆/၂၇ အရ သူ့ကို အသံချဲ့စက် ခွင့်ပြုမိန့်မရှိဘူး။ ပွဲမိန့် မရှိဘူးလို့ စွဲထားတယ်။ ဦးမောင်မောင်စိုးကလည်း ပန်းရဲ့လမ်း ခရီးစဉ် ဖျော်ဖြေတဲ့ပွဲကို သူက ကူညီရုံ သက်သက်ပဲ။ ဒီထဲမှာ ဖျော်ဖြေသူလည်း မဟုတ်၊ အသံချဲ့စက်ကို သူကိုယ်တိုင် ဌားရမ်းခဲ့ခြင်း၊ အသုံးပြုခဲ့ခြင်းလည်း မရှိဘူးဆိုတာတွေကို ဥပဒေဘောင်ထဲကပဲ ထုခြေသွားတာပါ။ "

ဒီနေ့ တရားရုံးကနေ အောက်တိုဘာလ (၂၅)ရက်နေ့ကို ပြန်လည် ချိန်းဆို လိုက်ပါတယ်။