မကွေးတိုင်းအတွင်းက သတင်းတွေကို အဓိကရေးသားဖြန့်ဝေနေတဲ့ မင်းဘူးမြို့အခြေစိုက် မကွေးပို့စ် သတင်းဌာနက သတင်းထောက် ဦးတင်ရွှေဟာ ဇန်နဝါရီလ ၂၁ ရက် ဒီနေ့ ညနေ ပိုင်းမှာ မကွေးထောင်တွင်း တရားရုံးကနေ ထောင်ဒဏ်သုံးနှစ် ချမှတ်ခံလိုက်ရတယ်လို့ သူနဲ့ နီးစပ်သူတစ်ဦးက RFA ကို အတည်ပြု ပြောပါတယ်။
"မကွေးထောင်ထဲမှာစစ်တဲ့ မင်းဘူးမြို့နယ် တရားရုံးကနေ သူ့ကို အလုပ်မပါ ထောင် သုံးနှစ် ချလိုက်ပါတယ်။ ချလိုက်တဲ့ပုဒ်မကတော့ ၅၀၅(ဂ) သွေးထိုးလှုံဆော်မှု သဘော မျိုးပေါ့။ သူက ပြီးခဲ့တဲ့နှစ် မတ်လကတည်းက အဖမ်းခံထားရတာပါ" လို့ သတင်းထောက် ဦးတင်ရွှေနဲ့ နီးစပ်တဲ့သူက ပြောပါတယ်။
ဦးတင်ရွှေဟာ မင်းဘူးမြို့နယ်မှာ ၂၀၁၀ ခုနှစ်ခန့်ကစလို့ သတင်းသမားအဖြစ် အသက် မွေးဝမ်းကျောင်းပြုနေသူတစ်ဦးလည်း ဖြစ်ပါတယ်။
၂၀၂၁ ခုနှစ် မတ်လက မကွေးပို့စ်ဂျာနယ်က တင်ထားတဲ့ မင်းဘူးမြို့ရဲ့ ညသပိတ် သတင်း တစ်ခုကို မင်းဘူးမြို့ ဖေ့စ်ဘွတ်လူမှုကွန်ရက်ဂရုတစ်ခုမှာ မျှဝေခဲ့တာနဲ့ ပတ်သက်လို့ မင်းဘူး မြို့နယ် ရဲစခန်းက လာရောက်ဖြေရှင်းဖို့ ခေါ်ယူစဉ် ဦးတင်ရွှေက သွားရောက်ခဲ့ရာမှာ တစ်ခါ တည်း အဖမ်းခံခဲ့ရတာပါ။
RFA က ကောက်ယူထားတဲ့ စာရင်းတွေအရ ဖေဖော်ဝါရီလ ၁ ရက်နေ့ စစ်အာဏာသိမ်းပြီး နောက်ပိုင်း အဖမ်းခံရတဲ့သတင်းသမား ၁၂၅ ဦးရှိပြီး အဲဒီထဲက ၆၅ ဦး ပြန်လွတ်လာပေမယ့် သတင်းသမား ၆၀ ကတော့ အကျဉ်းထောင်အသီးသီးမှာ ဆက်လက်ထိန်းသိမ်းခံထားရဆဲ ဖြစ်ပါတယ်။