မိုးကြိုးပြင် ရွာသား ၅ဝ ကို ပုဒ်မ ၄ ခုနဲ့ အမှုဖွင့်

လက်ပံတောင်းတောင်ကြေးနီစီမံကိန်း ကျောက်သည်ယာဉ်တွေကို ပိတ်ဆို့တားဆီးနေတဲ့ မိုးကြိုးပြင်ရွာသား ၁၀၀ ကျော်ကို ပြီးခဲ့တဲ့ မတ်လ ၂၄ ရက်နေ့က ရဲတပ်ဖွဲ့ကပစ်ခတ်ဖြိုခွင်းခဲ့တာနဲ့ ပတ်သက်ပြီး ဆားလင်းကြီးမြို့နယ် အထွေထွေအုပ်ချုပ်ရေးမှူး နဲ့ မြို့နယ်ရဲမှူးတို့ ဒီနေ့ ပူးတွဲ သတင်းစာရှင်းလင်းပွဲ ကျင်းပခဲ့တာဖြစ်ပါတယ်။

အဲဒီသတင်းစာရှင်းလင်းပွဲမှာ ဆားလင်းကြီးမြို့နယ် ရဲတပ်ဖွဲ့မှူး ရဲမှူး ဦးဌေးဝင်း က ရွာသားတွေက ရုန်းရင်းဆန်ခတ်မှု ဖြစ်ပွားအောင် ဖန်တီးခဲ့လို့ အမှုဖွင့်တာဖြစ် တယ်လို့ ပြောခဲ့ပါတယ်။

ပုသိမ်-မုံရွာ လမ်းပေါ်မှာ သွားလာနေတဲ့ ကြေးနီစီမံကိန်းကျောက်သယ်ယာဉ်တွေဟာ ယာဉ်စည်းကမ်း လမ်းစည်းကမ်း မလိုက်နာဘဲ ခေါက်ရေပြည့်ဖို့အတွက် အရှိန်မြင့်မောင်းနှင်နေကြတာကြောင့် ကျွဲ နွားတွေနဲ့ လူထိခိုက်မှုတွေ ရှိတယ်ဆိုပြီး မိုးကြိုးပြင်ရွာသားတွေက ပြီးခဲ့တဲ့ ဖေဖော်ဝါရီလကတည်းက တားဆီးပိတ်ဆို့ ခဲ့ကြတာဖြစ်ပါတယ်။

အဲဒီပစ်ခတ်ဖြိုခွင်းမှုကြောင့် ရွာသား ၁၀ ဦးနဲ့ ရဲတပ်ဖွဲ့ ၆ ဦး ဒဏ်ရာရရှိခဲ့တယ်လို့ သိရပါတယ်။ မိုးကြိုးပြင်ရွာသားတွေဘက်ကလည်း ရာဘာကျည်နဲ့ ပစ်ခတ်ခဲ့တဲ့ ရဲတပ်ဖွဲ့ဝင်တွေကို ပြန်လည် တရားစွဲဆိုသွားမယ်လို့ ပြောပါတယ်။

လက်ရှိအချိန်မှာတော့ စစ်ကိုင်းတိုင်းဒေသကြီး အစိုးရအဖွဲ့ရဲ့ ညွှန်ကြားချက်နဲ့ ဆားလင်းကြီးမြို့နယ် က ကျောက်ထုတ်စခန်းတွေနဲ့ ကျောက်ထုတ်ယာဉ်သွားလာမှု ကို ရက်အကန့်အသတ်မရှိ ပိတ်သိမ်း လိုက်ပါတယ်။