ခေတ်အဆက်ဆက် တိုင်းပြည်အုပ်ချုပ်ခဲ့သူတွေကို KNU ဝေဖန်

ခေတ်အဆက်ဆက်တိုင်းပြည်ကို အုပ်ချုပ်ခဲ့သူတွေဟာ နိုင်ငံရေးပြဿနာကို နိုင်ငံရေးအရဖြေရှင်းဖို့ စိတ်ဆန္ဒလုံးဝ မရှိခဲ့ကြောင်း ကရင်အမျိုးသားအစည်းအရုံး (KNU) ဗဟိုက ဝေဖန်လိုက်ပါတယ်။

KNU ဗဟိုက ဇန်နဝါရီ ၁ ရက်နေ့မှာ ထုတ်ပြန်တဲ့ နှစ်သစ်ကူးသဝဏ်လွှာမှာ ထည့်သွင်းဝေဖန်ထားတာပါ။

KNU အနေနဲ့ နိုင်ငံရေးအရ တွေ့ဆုံဆွေး‌နွေး အဖြေရှာတာကို ခေတ်အဆက်ဆက် ကြိုးပမ်းဆောင်ရွက်ခဲ့ပေမဲ့ တစ်ကျော့ပြန် စစ်အာဏာသိမ်းမှုကြောင့် တွေ့ဆုံဆွေးနွေးမှုတွေဟာ အဆုံးသတ်ခဲ့ရတယ်လို့ ဆိုပါတယ်။

အခုဆိုရင် စစ်အာဏာသိမ်းမှုဟာ သုံးနှစ်နီးပါး ရှိလာပြီဖြစ်တာကြောင့် ပြည်သူတွေဟာ ကျပ်တည်းမှုတွေ၊ ကြီးမားတဲ့ဆုံးရှုံးမှုတွေရင်ဆိုင်ခဲ့ရတဲ့အပြင် မျှော်လင့်ချက်အိပ်မက်တွေဟာလည်း ပျောက်ဆုံးခဲ့ရတယ်လို့လည်း ထောက်ပြထားပါတယ်။

KNU ရဲ့ ဝေဖန်ချက်နဲ့ပတ်သက်ပြီး စစ်ကောင်စီ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းကို RFA က မေးမြန်းဖို့ ဖုန်းဆက်ခဲ့ပေမဲ့ လက်ခံဖြေဆိုခြင်းမရှိပါဘူး။

တန်းတူညီမျှခွင့် ဖော်ဆောင်ဖို့နဲ့ နိုင်ငံရေးပဋိပက္ခတွေ၊ ခုခံတွန်းလှန်စစ်တွေ အဆုံးသတ်ဖို့ အကောင်းဆုံးနည်းလမ်းဟာ ငြိမ်းချမ်းတဲ့နည်းနဲ့ နိုင်ငံရေးအရ တွေ့ဆုံဆွေးနွေးအဖြေရှာရမှာလို့လည်း ပြောပါတယ်။

နိုင်ငံရေးပြဿနာကို တွေ့ဆုံဆွေးနွေးအဖြေရှာပြီး တန်းတူညီမျှခွင့်နဲ့ ကိုယ်ပိုင်ပြဋ္ဌာန်းခွင့်ရှိတဲ့ ဖက်ဒရယ်ဒီမိုကရေစီတည်ဆောက်မှသာ ပြည်တွင်းစစ်ပဋိပက္ခကို ရပ်တန့်နိုင်မယ်လို့ ဆိုပါတယ်။

အာဏာရှင် ပြုတ်ကျရေးတင်မကဘဲ လူမျိုးကြီးဝါဒစနစ်ကို အမြစ်ပါမကျန် တွန်းလှန်တိုက်ဖျက်နိုင်ရေး ရှေးရှု လုပ်ဆောင်နေတာကြောင့် ပြည်သူတွေလည်း လက်ရှိတော်လှန်ရေးမှာ ဆက်လက်ပူးပေါင်းပါဝင်ကြဖို့ KNU ဗဟိုက တိုက်တွန်းထားပါတယ်။