လက်နက်ကြီးကြောင့် ဖရူဆိုက စစ်ဘေးဒုက္ခသည် ကလေးငယ် သေဆုံး

ကယားပြည်နယ်၊ ဖရူဆိုမြို့နယ် အနောက်ဘက်ခြမ်းက ကျေးရွာတွေကို အောက်တိုဘာလ ၇ ရက်မှာ စစ်ကောင်စီတပ်က လက်နက်ကြီးနဲ့ ပစ်ခတ်ခဲ့တာကြောင့် ကလေးငယ်တစ်ဦး သေဆုံးခဲ့တယ်လို့ ကရင်နီအမျိုးသားများကာကွယ်ရေးတပ် (KNDF) တပ်ရင်း ၁၅ က ထုတ်ပြန်ပါတယ်။

အသက်ရှစ်နှစ်အရွယ် စစ်ဘေးဒုက္ခသည် ကလေးငယ်ဟာ လက်နက်ကြီးကျည်စတွေ ထိမှန်ပြီး နေရာမှာတင် သေဆုံးခဲ့တာပါ။

တိုက်ပွဲ ဖြစ်ပွားတာမရှိဘဲ စစ်ကောင်စီတပ်က လက်နက်ကြီးကျည် လေးလုံးထက်မနည်း ပစ်ခတ်ခဲ့တယ်လို့ ဒေသခံတစ်ဦးက ပြောပါတယ်။

"ဖရူဆို အခြေစိုက် အမှတ်-၁၄ တန်းမြှင့်စစ်လေ့ကျင့်ရေးကျောင်းက ပစ်လိုက်တာ။ လေးလုံးပစ်တာမှာ နှစ်လုံးက ရွာကိုကျပြီး ပေါက်ကွဲတာ။ ပေါက်ကွဲတဲ့ အပိုင်းအစထိမှန်ပြီး ကလေးကတော့ နေရာမှာတင်ဆုံးတယ်။ အိမ်တွေကတော့ အမိုးအကာတွေ ပွင့်ထွက်သွားပါတယ်"

လုံခြုံရေးအခြေအနေကြောင့် လက်နက်ကြီးကျည် ကျရောက်ပေါက်ကွဲခဲ့တဲ့ ရွာနာမည်နဲ့ သေဆုံးသူရဲ့ အသေးစိတ် အချက်အလက်တွေကို သူက ထုတ်မပြောပါဘူး။

အဲဒီကျေးရွာမှာ စစ်ဘေးဒုက္ခသည် ၁၀၀ ကျော် နေထိုင်နေတယ်လို့ ဒေသခံက ပြောပါတယ်။

ဒီပစ်ခတ်မှုနဲ့ပတ်သက်လို့ စစ်ကောင်စီရဲ့ ကယားပြည်နယ် ပြောခွင့်ရသူ ဦးမြင့်ကြည်ကို RFA က ဖုန်းနဲ့ဆက်သွယ်ခဲ့ပေမယ့် လက်ခံဖြေဆိုတာ မရှိပါဘူး။

နဂိုကတည်းက တိုက်ပွဲတွေကြောင့် အိုးအိမ်စွန့်ခွာ ထွက်ပြေးနေရတဲ့ ဒေသခံတွေဟာ ဒုက္ခသည်စခန်းတွေမှာလည်း စိုးရိမ် ထိတ်လန့်မှုတွေနဲ့ နေထိုင်နေရတယ်လို့ ဒေသခံတွေက ပြောပါတယ်။

အာဏာသိမ်းပြီးနောက် စစ်ကောင်စီတပ်ရဲ့ တိုက်ခိုက်မှုတွေကြောင့် အသက် ၁၈ နှစ်အောက် ကလေး ၄၉၁ ဦး သေဆုံးခဲ့တယ်လို့ အမျိုးသားညီညွတ်ရေးအစိုးရ NUG လူ့အခွင့်အရေး ဝန်ကြီးဌာနက အောက်တိုဘာလ၄ ရက်မှာ ပြောဆိုခဲ့ပါတယ်