ဇိုင်းအောင်စခန်းက စစ်ပြေး ဒုက္ခသည်တွေထွက်ပြေးနေရ

"တပ်မတော်က လက်နက်ကြီးတွေပစ်လို့ အဲ့ဒါကျလာလို့ အကုန်လုံးလန့်ပြီးမှ ထွက်ပြေးကြတယ်။ အခု Camp မှာလည်းနေလို့မဖြစ်လို့ ဒီမှာရွှေ့နေရတယ်။ ဝိုင်းမော်သွားတဲ့ ကားလမ်းမှာပဲပုံနေတယ်။ ဟိုဘက်လည်း မသွားရ ဒီဘက်လည်း မရွှေ့ရ နောက်လည်းမဆုတ်ရဆိုပြီး ခလယ်မှာကြားမှာ ကျနေပြီ။ ဟိုးအရှေ့ဘက်မှာ တိုက်ပွဲဖြစ်နေလို့"

အစိုးရတပ်မတော်နဲ့ ကေအိုင်အေတို့ တိုက်ပွဲဖြစ်ပွားနေတဲ့ ပစ်ခတ်သံတွေကို ပြီးခဲ့တဲ့ ၃ လ လောက်ကတည်းက ဇိုင်းအောင်ဒုက္ခသည်စခန်းကနေ ကြားနေရပြီး အခုရက်ပိုင်း သုံးလေးရက်အတွင်းမှာ ပိုမိုပြင်းထန်လာတဲ့ အနေအထားရှိနေတယ်လို့ ဒေါ်ခွန်ရာ က ပြောပါတယ်။

မနေ့ညက စခန်းအတွင်းကိုကျတဲ့ လက်နက်ကြီးဟာ အစိုးရတပ်မတော်က ပစ်လိုက်တာ ဖြစ်နိုင်တယ် လို့လည်း ပြောပါတယ်။

တပ်မတော်က မြစ်ကြီးနား-ဗန်းမော်ကားလမ်းရဲ့ ၇ မိုင်အကွာအဝေးမှာ ရှိတဲ့ KIA တပ်မဟာ ၅ လက်အောက် တပ်ရင်း ၃ ဌာနချုပ်ရှိရာ လိုင်ဖောင်စခန်းကို မနေ့ညနေပိုင်းက သိမ်းပိုက်ခဲ့တယ်လို့ ကာကွယ်ရေးဦးစီးချုပ်ရုံးက သတင်းထုတ်ပြန်ထားပါတယ်။

မနေ့မနက်ပိုင်းကစပြီး လိုင်ဖောင်စခန်းကို လေကြောင်း၊ ခြေလျင်၊ အမြောက် ၊ တင်ကားနဲ့ လက်နက်ကြီးတွေ ပစ်ကူပြီး သိမ်းယူနိုင်ခဲ့တာဖြစ်တယ်လို့ သတင်းထုတ်ပြန်ချက်မှာ ပါရှိပါတယ်။