အမ်းက ထွက်ပြေးလာတဲ့ စစ်ကြောင်းတိုက်ခိုက်ခံရပြီး စစ်ကောင်စီတပ်ဖွဲ့ဝင် ၁၇ ဦး ဖမ်းဆီးခံရ
အမ်းမြို့နယ်ကနေ ထွက်ပြေးလာတဲ့ စစ်ကောင်စီတပ် စစ်ကြောင်း နှစ်ကြောင်းကို အမ်း-ပဒါန်းလမ်းမအနီးမှာ ပိတ်ဆို့တားဆီးခဲ့တယ်လို့ ချင်းကာကွယ်ရေးတပ်-အရှိုတပ်ဖွဲ့က ပြောပါတယ်။
-
RFA Burmese
2024-12-28 -
-
-
ရခိုင်ပြည်နယ် အမ်းမြို့နယ် အနောက်ပိုင်းတိုင်းစစ်ဌာနချုပ် (နပခ) ကို အာရက္ခတပ်တော် (AA) သိမ်းပိုက်လိုက်တဲ့နောက် ထွက်ပြေးသွားတဲ့ စစ်ကောင်စီတပ်ဖွဲ့ဝင်တွေထဲက ၁၇ ဦးကို ချင်းကာကွယ်ရေးတပ်-အရှိုအဖွဲ့က ဖမ်းဆီးလိုက်ပါတယ်။
အမ်းမြို့နယ်ကနေ ထွက်ပြေးလာတဲ့ စစ်ကောင်စီတပ်ဖွဲ့ဝင် ၉ဝ ဝန်းကျင် ပါဝင်တဲ့ စစ်ကြောင်း နှစ်ကြောင်းကို မကွေးတိုင်း၊ ငဖဲမြို့နယ် အမ်း-ပဒါန်းလမ်းမအနီးမှာ ပိတ်ဆို့တားဆီးခဲ့တယ်လို့ ချင်းကာကွယ်ရေးတပ်-အရှိုတပ်ဖွဲ့က ဒီဇင်ဘာ ၂၈ ရက်နေ့မှာ သတင်းထုတ်ပြန်ခဲ့ပါတယ်။
အဲဒီထဲမှာ စစ်ကောင်စီတပ်သားတချို့ လက်နက်ချခဲ့ပေမဲ့ ထွက်ပြေးသွားတဲ့ တပ်ဖွဲ့ဝင်တွေကိုတော့ ဒီဇင်ဘာ ၂၅ ရက်နေ့ကနေ ၂၇ ရက်နေ့အထိ သုံးရက်အတွင်း လိုက်လံရှာဖွေဖမ်းဆီးခဲ့တယ်လို့ ဆိုပါတယ်။ ထွက်ပြေးသွားသူတွေထဲက စစ်ကောင်စီတပ်ဖွဲ့ဝင် ၁၇ ဦးကို ဖမ်းဆီးမိခဲ့ပြီး လက်နက်ခဲယမ်းတွေနဲ့ စစ်အသုံးအဆောင်တွေလည်း သိမ်းဆည်းရမိခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
ချင်းကာကွယ်ရေးတပ် - အရှိုအဖွဲ့တာဝန်ရှိသူ ဆလိုင်းရိုးချင်းက “လက်ရှိစစ်ဆင်ရေးနဲ့ ဆက်စပ်နေသေးတာမို့ အလင်းဝင်လာသူတွေကိုတော့ ပြောလို့မရသေးပါဘူး” လို့ ပြောပါတယ်။
စစ်ကောင်စီတပ်ဖွဲ့ဝင် ၂ဝ ကျော် ထွက်ပြေးလွတ်မြောက်နေဆဲဖြစ်တာကြောင့် နယ်မြေရှင်းလင်းရေး ဆောင်ရွက်နေဆဲဖြစ်တယ်လို့လည်း ဆိုပါတယ်။
အမ်းမြို့နယ်ကနေ ထွက်ပြေးလာတဲ့ စစ်ကောင်စီစစ်ကြောင်းတွေ တိုက်ခိုက်ခံရတာနဲ့ပတ်သက်ပြီး စစ်ကောင်စီပြောရေးဆိုခွင့်ရှိသူ ဗိုလ်ချုပ် ဇော်မင်းထွန်းကို RFA က တယ်လီဖုန်းနဲ့ ဆက်သွယ်မေးမြန်းပေမဲ့ ဖုန်းမဖြေပါဘူး။
အမ်းမြို့နယ်အခြေစိုက် စစ်ကောင်စီတပ်ရဲ့ အနောက်ပိုင်းတိုင်းစစ်ဌာနချုပ် (နပခ) ကို ဒီဇင်ဘာ ၂၀ ရက်နေ့မှာ အာရက္ခတပ်တော် (AA) က သိမ်းပိုက်ခဲ့တာဖြစ်ပါတယ်။