ဂျပန်ဆက်သွယ်ရေးကုမ္ပဏီ မြန်မာနိုင်ငံမှာ လုပ်ငန်းတိုးချဲ့ဖို့ ပြင်ဆင်

• 
  2012-12-25

ပွင့်လင်းလာတဲ့မြန်မာနိုင်ငံမှာ ဆက်သွယ်ရေးနည်းပညာလုပ်ငန်းတွေ ပိုပြီးလိုအပ်လာမှာဖြစ်တာနဲ့အညီ၊ ဂျပန်ဆက်သွယ်ရေး ပစ္စည်းထုတ်လုပ်ရေးလုပ်ငန်းတွေ၊ အရောင်းဆိုင်တွေကို မြန်မာနိုင်ငံမှာဖွင့်လှစ်တော့မယ် လို့ ဆိုပါတယ်။

ပထမဦးဆုံး NEC ကုမ္ပဏီ ရုံးခွဲတစ်ခု ကို ဇန်နဝါရီလအတွင်း ရန်ကုန်မြို့မှာ စတင်ဖွင့်လှစ်ပြီး၊ နေပြည်တော်မှာ လည်း ဆက်လက်ဖွင့်လှစ်မယ်လို့ ကုမ္ပဏီတာဝန်ရှိသူတစ်ဦးက ပြောပါတယ်။

မြန်မာအစိုးရက ၂၀၁၅ ခုနှစ်မှာ တိုင်းပြည်လူဦးရေရဲ့တဝက် မိုဘိုင်းဖုန်းအသုံးပြုနိုင်ဖို့ ရည်မှန်းထားတဲ့အတွက် NEC အနေနဲ့ တယ်လီဖုန်းဆက်သွယ်ရေး လုပ်ငန်းကွန်ယက်အပေါ် အထူးအာရုံစိုက်ထားကြောင်းလည်း ပြောဆိုပါတယ်။

အခုအခါ တရုတ်ပြည်မှာ လုပ်အားခတွေ မြင့်တက်လာနေတဲ့အပြင် ဂျပန်ဆန့်ကျင်ရေး စိတ်ဓါတ်တွေ တိုးပွားလာနေတာကြောင့် ဂျပန်ကုမ္ပဏီတွေဟာ မြန်မာနဲ့ တခြားဒေသတွင်း နိုင်ငံတွေဆီကို ရွှေ့ပြောင်းဖို့ လေ့လာကြည့်ရှုနေကြပါတယ်။

ဒီအတွင်း ဂျပန် နိပွန်ဖေါင်ဒေးရှင်းက မွန်ပြည်နယ်မှာ လူသားချင်းစာနာကူညီရေး ထောက်ပံ့မှုတွေ ဆောင်ရွက်ခဲ့ ပါတယ်။