ရိုဟင်ဂျာအရေး ICC စုံစမ်းစစ်ဆေးရေးအဖွဲ့ ဘင်္ဂလားဒေ့ရှ်နိုင်ငံရောက်နေ

ICC နိုင်ငံတကာရာဇဝတ်ခုံရုံး ရှေ့နေချုပ် Karim AA Khan နဲ့အဖွဲ့ဟာ ဘင်္ဂလားဒေ့ရှ်နိုင်ငံကို ရောက်နေပြီး ဘင်္ဂလားဒေ့ရှ် နိုင်ငံခြားရေးဝန်ကြီး အဗ္ဗဒူလ် မိုမင်နဲ့ ဇူလိုင်လ ၄ ရက်နေ့က တွေ့ဆုံခဲ့ပါတယ်။

ရိုဟင်ဂျာလူမျိုးတုံးသတ်ဖြတ်မှု အမှုကိစ္စကို အမြန်ဆုံးပြီးပြတ်အောင်ဖြေရှင်းပေးဖို့ နိုင်ငံခြားရေးဝန်ကြီးက တိုက်တွန်းခဲ့တယ်လို့ ဘင်္ဂလားဒေ့ရှ်သတင်းဌာနတစ်ခုဖြစ်တဲ့ UNB သတင်းမှာ ဖော်ပြပါတယ်။

တရားမျှတမှုရဖို့ နှောင့်နှေးနေတာဟာ တရားမျှတမှုမရှိတာနဲ့တူတူပဲလို့ ဘင်္ဂလားဒေ့ရှ်ဝန်ကြီးက ပြောခဲ့တယ်လို့လည်း ဆိုပါတယ်။

မြန်မာစစ်တပ်က ရိုဟင်ဂျာတွေအပေါ် ကျူးလွန်ခဲ့တဲ့ ရာဇ၀တ်မှုတွေကို စစ်ဆေးမယ့် ICC ရဲ့ စုံစမ်းစစ်ဆေးရေးအဖွဲ့ကို ရှေ့နေချုပ် Karim Khan က ဦးဆောင်ပါတယ်။

လေးရက်ကြာ ဘင်္ဂလားဒေ့ရှ်နိုင်ငံခရီးစဉ်အတွင်း ကော့ဘဇားက ရိုဟင်ဂျာဒုက္ခသည်တွေနဲ့ တွေ့ဆုံပြီး တရားမျှတမှုရဖို့ ICC ကလုပ်နေတဲ့ ကိစ္စရပ်တွေကို ရှင်းပြသွားဖို့ရှိတယ်လို့ ထုတ်ပြန်ထားတာပါ။

ဒီခရီးစဉ်ဟာ ICC စုံစမ်းစစ်ဆေးရေးအဖွဲ့ရဲ့ ဒုတိယအကြိမ်မြောက်ဖြစ်ပါတယ်။ တရားမျှတမှုဟာ နေ့ချင်းညချင်းတော့ ဖြစ်လာမှာမဟုတ်ပေမဲ့ အတူတကွပူးပေါင်းပြီး ကြိုးပမ်းလုပ်ဆောင်သွားဖို့ လိုတယ်လို့ ရှေ့နေချုပ် Karim Khan က ပြီးခဲ့တဲ့နှစ်က ပထမဆုံးအကြိမ် ခရီးစဉ်အပြီးမှာ သတင်းထောက်တွေကို ပြောခဲ့ပါတယ်။

မြန်မာစစ်တပ်ရဲ့ လက်ချက်ကြောင့် သိန်းနဲ့ချီတဲ့ ရိုဟင်ဂျာတွေ ဘင်္ဂလားဒေ့ရှ်နိုင်ငံဘက် ထွက်ပြေးခဲ့ရတဲ့ဖြစ်ရပ်ကို ICC က စုံစမ်းစစ်ဆေးနေတာပါ။

ဒီလုပ်ရပ်ဟာ မြန်မာစစ်တပ်ကျူးလွန်တဲ့ လူမျိုးတုံးသတ်ဖြတ်မှုဖြစ်တယ်လို့ အမေရိကန်က ထုတ်ပြန်ထားပါတယ်။

ဒါ့အပြင် ၂ဝ၂၁ ခုနှစ် ဖေဖော်ဝါရီ ၁ ရက်နေ့ စစ်တပ်အာဏာသိမ်းပြီးနောက်မှာလည်း ဗိုလ်ချုပ်မှူးကြီး မင်းအောင်လှိုင်ဦးဆောင်တဲ့ စစ်ကောင်စီဟာ လူပေါင်း ၃၅ဝဝ နီးပါးကို သတ်ဖြတ်ခဲ့ပါတယ်။

ရိုဟင်ဂျာကိစ္စသာမက စစ်အာဏာသိမ်းပြီးအကြမ်းဖက်လုပ်ရပ်တွေအတွက်လည်း စစ်ခေါင်းဆောင်တွေကို ICC တရားရုံးမှာ တရားစွဲတင်နိုင်ဖို့ ကြိုးပမ်းတာတွေရှိနေပါတယ်။

ကုလသမဂ္ဂ လုံခြုံရေးကောင်စီအနေနဲ့ မြန်မာအရေးကို နိုင်ငံတကာရာဇဝတ်ခုံရုံး ICC ကိုလွှဲပြောင်းတရားစီရင်ဖို့ မြန်မာ့အရေးလှုပ်ရှားတဲ့ နိုင်ငံတကာ လူ့အခွင့်အရေးအဖွဲ့တွေက တောင်းဆိုနေပါတယ်။