ကုလ လူ့အခွင့်အရေးကောင်စီ မှာ မြန်မာပြည်ဆိုင်ရာ ဆုံးဖြတ် ချက်ချဖို့ HRW တိုက်တွန်း

• 
  2017-02-24

ကုလသမဂ္ဂ လူ့အခွင့်အရေးကောင်စီ အဖွဲ့ဝင်နိုင်ငံတွေအနေနဲ့ လာမယ့် (၃၄) ကြိမ်မြောက် ညီလာခံမှာ မြန်မာနိုင်ငံရဲ့ လူ့အခွင့်အရေး အခြေအနေတွေနဲ့
ပတ်သက်ပြီး အချက် ၄ ချက်ပါဝင်တဲ့ ဆုံးဖြတ်ချက်ကို ချမှတ်ပြဌာန်းဖို့ HRW လူ့အခွင့်အရေးစောင့်ကြည့်ရေးအဖွဲ့က သောကြာနေ့ မနေ့က တိုက်တွန်း လိုက်ပါတယ်။

အဲဒီ ဆုံးဖြတ်ချက်မှာ ပါဝင်သင့်တဲ့ အချက်တွေအဖြစ် (၁) ကုလလူ့အခွင့်အရေးကောင်စီရဲ့ မြန်မာပြည်ဆိုင်ရာ လူ့အခွင့်အရေး
အထူးကိုယ်စားလှယ်သက်တမ်းကို နောက်ထပ်တနှစ် ထပ်မံ တိုးမြှင့်ရေး၊ (၂) ရခိုင်ပြည်နယ် က လူ့အခွင့်အရေးချိုးဖေါက်မှုဆိုင်ရာ စွပ်စွဲချက်တွေနဲ့
ပတ်သက်ပြီး လွတ်လပ်တဲ့ နိုင်ငံတကာစုံစမ်းရေးအဖွဲ့ တခု ဖွဲ့စည်းရေး၊ (၃) မြန်မာအစိုးရအာဏာပိုင်တွေအနေနဲ့ ကုလ အထူးကိုယ်စားလှယ်နဲ့ စုံစမ်းရေးအဖွဲ့ကိုကူညီပူးပေါင်းဆောင်ရွက်ရေး၊ လုံခြုံရေးတပ်ဖွဲ့တွေရဲ့လူအခွင့်အရေးချိုးဖေါက်မှုတွေကို ရပ်တန့်ရေး၊ လူသားချင်းစာနာမှု အကူအညီတွေ လွတ်လပ်စွာ ပေးခွင့်ပြုရေး၊ လေ့လာသူတွေ သတင်းထောက်တွေ သွားခွင့်ပြုရေး၊ အမျိုးဘာသာ ကာကွယ်စောင့်ရှောက်ရေး ဥပဒေ ၄ ခု ဖျက်သိမ်းရေး၊ ဆက်သွယ်ရေး ဥပဒေ ပုဒ်မ ၆၆(ဃ)နဲ့ စုဝေးခွင့်ဆိုင်ရာ ပုဒ်မ ၅ဝ၅ ဖျက်သိမ်းရေးတို့ကို ဖေါ်ပြထားပြီးနောက်ဆုံးအချက် (၄) အဖြစ် ကုလသမဂ္ဂ လူ့အခွင့်အရေးကောင်စီရဲ့ မြန်မာပြည်ဆိုင်ရာအထူးကိုယ်စားလှယ်အနေနဲ့ မြန်မာအစိုးရနဲ့ လက်တွဲပြီး အခြေအနေတွေ တိုးတက်အောင်ဆောင် ရွက်စေဖို့ မေတ္တာရပ်ခံထားပါတယ်။