မြန်မာကလေးငယ် ရှစ်သန်းနီးပါး အကာအကွယ်လိုအပ်နေကြောင်း အီးယူ ထုတ်ပြန်

မြန်မာနိုင်ငံက ကလေးငယ် ရှစ်သန်းနီးပါးဟာ အကာအကွယ်ပေးရေး အစီအစဉ်တွေလိုအပ်နေတယ်လို့ ဥရောပ သမဂ္ဂ (EU) က မေလ ၂၉ ရက်မှာ သတင်းထုတ်ပြန်ပါတယ်။

စစ်အာဏာသိမ်းမှုကြောင့်ဖြစ်လာတဲ့ လက်နက်ကိုင်ပဋိပက္ခတွေကြောင့် ကလေးငယ်တွေကို အကြမ်းဖက်မှုတွေကနေ ကာကွယ်ဖို့ မဖြစ်နိုင်လောက်အောင် ဆိုးရွားသွားတယ်လို့လည်း ထုတ်ပြန်ချက်မှာ ပြောထားပါတယ်။

ပဋိပက္ခတွေက လွတ်လပ်စွာသွားလာခွင့်နဲ့ အကူအညီရယူခွင့်တွေကို ပြင်းပြန်းထန်ထန် ကန့်သတ်ထားရတယ်လို့လည်း ဆိုပါတယ်။

အခြေခံအဆောက်အဦတွေ ပျက်စီးမှု၊ လုံခြုံရေး အခြေအနေ၊ အကြမ်းဖက်မှုနဲ့ စစ်ဆေးရေးဂိတ်တွေ တိုးလာတာ အပါအဝင် စစ်ကောင်စီရဲ့ လုပ်ထုံးလုပ်နည်းတွေကြောင့်လည်း လူသားချင်းစာနာမှု အကူအညီပေးရေးကိစ္စတွေက ပိုပြီးဆိုးရွားသွားတယ်လို့ အီးယူက ပြောပါတယ်။

နိုင်ငံရေးပြဿနာတွေ၊ ပြင်းထန်တဲ့ပဋိပက္ခတွေနဲ့ ကာလကြာအောင် ကျောင်းပိတ်ထားရတာတွေကလည်း ကလေးတွေရဲ့ ပညာသင်ကြားခွင့်ကို အကြီးအကျယ်ထိခိုက်ခဲ့တယ်လို့ ထုတ်ပြန်ချက်မှာ ဖော်ပြပါတယ်။ ဒီအခြေအနေတွေကြောင့်လည်း ကျောင်းထွတ်နှုန်းတွေ တိုးလာတယ်လို့ ဆိုပါတယ်။

အာဏာသိမ်းမှုကြောင့် ကျန်းမာရေးနဲ့ အစာအဟာရ အကျပ်အတည်းတွေကြုံရတဲ့အပြင် ကျန်းမာရေး အဆောက်အအုံတွေနဲ့ ဝန်ထမ်းတွေကို တိုက်ခိုက်တာတွေကြောင့်လည်း ကာကွယ်ဆေးထိုးလုပ်ငန်းတွေနဲ့ လူထုကျန်းမာရေး ဝန်ဆောင်မှုလုပ်ငန်းတွေလည်း ရပ်တန့်သွားတယ်လို့ ဆိုပါတယ်။

ကလေးတွေအပေါ် အဲဒီသက်ရောက်မှုတွေက အနာဂတ်မြန်မာနိုင်ငံရဲ့ မျိုးဆက်အတွက် ကပ်ဆိုးတစ်ခုလို ဖြစ်လာလိမ့်မယ် ဥရောပသမဂ္ဂက ပြောပါတယ်။ ဒါ့အပြင် ပဋိပက္ခနဲ့ ရွှေ့ပြောင်းနေထိုင်မှုတွေကလည်း ကလေးငယ်တွေကို အဟာရချို့တဲ့မှုတွေ ဖြစ်စေတယ်လို့ ဆိုပါတယ်။

မြန်မာ့လူဦးရေရဲ့ လေးပုံတစ်ပုံနီးပါးဖြစ်တဲ့ လူဦးရေ ၁၂ ဒသမ ၉ သန်းဟာ စားနပ်ရိက္ခာ မလုံလောက်တဲ့အတွက် ကလေးတွေရဲ့ ပညာရေးကိုထိခိုက်နေသလို အိုးအိမ်စွန့်ခွာထွက်ပြေးနေရတဲ့ လူဦးရေသုံးသန်းကျော်ရဲ့ တစ်ဝက်နီးပါးကလည်း ကလေးတွေဖြစ်နေတယ်လို့ ထုတ်ပြန်ချက်မှာ ဖော်ပြထားပါတယ်။