တိုင်းရင်းသား လူငယ်ညီလာခံ ရှမ်းပြည်နယ်အစိုးရ ဆိုင်းငံ့

မြန်မာနိုင်ငံလုံးဆိုင်ရာ တိုင်းရင်းသားလူငယ်များ ညီလာခံကျင်းပဖို့အတွက် ရှမ်းပြည်နယ်ဝန်ကြီးချုပ်ကို တွေ့ဆုံ ခွင့်တောင်းခံတဲ့ကိစ္စကို  ရှမ်းပြည်နယ် အစိုးရအဖွဲ့ က ဆိုင်းငံ့လိုက်တာနဲ့ပတ်သက်ပြီး တိုင်းရင်းသား လူငယ်အဖွဲ့ အစည်းတွေက ကန့်ကွက်လိုက်ကြပါတယ်။

မြန်မာနိုင်ငံလုံးဆိုင်ရာ တိုင်းရင်းသားလူငယ်များ ညီလာခံကို ဇူလိုင် ၂၇ ရက်နေ့ကနေ ၃၀ ရက်နေ့အထိ ကျင်းပဖို့အတွက် ပင်လုံမြို့ကျောက်တိုင်ကွင်းကို အသုံးပြုခွင့်နဲ့ ညီလာခံကျင်းပခွင့် ပြုဖို့အတွက် တိုင်းရင်းသား လူငယ်များ ညီလာခံဖြစ်မြောက်ရေး ကော်မတီက ရှမ်းပြည်နယ် ဝန်ကြီးချုပ်ကို တွေ့ဆုံခွင့်တောင်းခံ ခဲ့တဲ့အပေါ် ဆိုင်းငံ့ထားကြောင်း ပြည်နယ်ဝန်ကြီးချုပ်ကိုယ်စား ဗမာတိုင်းရင်းသားရေးရာဝန်ကြီးက  ဇူလိုင် ၂၅ ရက်နေ့က အကြောင်းပြန်ခဲ့ပါတယ်။

အခုလို အကြောင်းပြန်ကြားချက်အပေါ် ညီလာခံတက်ရောက်မဲ့ ထားဝယ်၊ မြိတ်၊ ဆလုံတိုင်းရင်းသားလူငယ်ကိုယ် စားလှယ်တွေက ကန့်ကွက်လိုက်ကြ ပြီး   မြန်မာနိုင်ငံလုံးဆိုင်ရာ တိုင်းရင်းသား ညီလာခံကို မူလသတ်မှတ်ထားတဲ့ အစီအစဉ်အတိုင်း ဆောင်ရွက်နိုင်ဖို့ အခြား တိုင်းရင်းသား လူငယ်များနဲ့အတူ လက်တွဲပူးပေါင်း ဆောင်ရွက် သွားမယ်လို့မနေ့က ကြေညာချက်ထုတ်ပြန်ခဲ့ပါတယ်။

အလားတူ အမေရိကန်ပြည်ထောင်စု ကယ်လီဖိုးနီးယားပြည်နယ် ရှမ်းယဉ်ကျေးမှုနဲ့ လူမှုရေးအသင်း ကလည်း ဒီဆိုင်းငံ့စာကို ပြန်လည်ရုတ်သိမ်းပေး ဖို့ တောင်းဆိုလိုက်ပါတယ်။ လူငယ်များညီလာခံဟာ တိုင်းရင်းသား လူမျိုးများ ရင်ကြားစေ့ရေး ပြန်လည်သင့်မြတ်ရေး၊ နိုင်ငံတော်ငြိမ်းချမ်းသာယာ ဝပြောရေး၊ ဖက်ဒရယ် ပြည်ထောင် စု တည်ဆောက်ရေးတို့ကို အထူးအထောက်အကူဖြစ်စေနိုင်တဲ့ အတွက် ရှမ်းပြည်နယ်အစိုးရအနေနဲ့ အားပေး ကူညီပေးဖို့လည်း မေတ္တာရပ်ခံလိုက်ပါတယ်။

ဒီအခြေအနေနဲ့ပတ်သက်ပြီး  တိုင်းရင်းသားလူငယ်များညီလာခံ ဖြစ်မြောက်ရေး ကော်မတီက ကိုခိုင်လမင်း ကို RFA အဖွဲ့သူ မခင်ခင်အိက ဆက်သွယ်မေးမြန်း ထားပါတယ်။