ငလျင်ကြောင့် သေဆုံးသူ ၃၅၀၀ ကျော်ရှိလာ

နိုင်ငံတစ်ဝန်းမှာ ငလျင်ကြောင့် သေဆုံးသူ ၃၅၁၄ ဦးအထိရှိလာပြီး ဒဏ်ရာရသူ ၄၈၀၉ ဦးရှိကြောင်း စစ်ကောင်စီက ဧပြီလ ၆ ရက် ညပိုင်းမှာ သတင်းထုတ်ပြန်ပါတယ်။

ဒါ့အပြင် ပျောက်ဆုံးနေသူ ၂၁၀ ရှိတယ်လို့ စစ်ကောင်စီကဆိုပါတယ်။

ငလျင်ကြောင့် အပျက်အစီးတွေကြား ပိတ်မိနေသူ ၆၅၃ ဦးကိုတော့ အသက်ရှင်လျက် ရှာဖွေကယ်ဆယ်နိုင်ခဲ့တယ်လို့လည်း ထုတ်ပြန်ချက်မှာဖော်ပြပါတယ်။

ကယ်ဆယ်ရေးအဖွဲ့တွေကတော့ လက်ရှိအချိန်အထိ ရှာဖွေကယ်ဆယ်ရေးမလုပ်နိုင်တဲ့နေရာ အများအပြားကျန်ရှိနေသေးတယ်လို့ပြောပါတယ်။

တချိန်တည်းမှာပဲ ငလျင်အပျက်အစီးတွေကြား ကူညီကယ်ဆယ်ရေးတွေဆက်လုပ်ဖို့ စစ်ကောင်စီရဲ့ အကန့်အသတ်တွေ ရှိနေပါတယ်။

ကူညီကယ်ဆယ်ရေးအဖွဲ့တွေ ကြိုတင်ခွင့်ပြုချက်တောင်းခံဖို့ နဲ့ သီးခြား လွတ်လပ်စွာလုပ်ကိုင်ခွင့်မပြုတော့ဘူးလို့ စစ်ကောင်စီဒုတိယဥက္ကဋ္ဌ ဒုတိယ ဗိုလ်ချုပ်မှူးကြီးစိုးဝင်းက ပြောဆိုထားပါတယ်။

ကုလသမဂ္ဂအပါအဝင် နိုင်ငံတကာအဖွဲ့အစည်းတွေကတော့ ငလျင်ကြောင့် အရေးပေါ်အကူအညီလိုအပ်နေသူတွေဆီ လူသားချင်းစာနာမှုအကူအညီတွေ အမြန်ဆုံးရောက်နိုင်ဖို့ လွတ်လွတ်လပ်လပ်ခွင့်ပြုပေးဖို့ စစ်ကောင်စီကို တိုက်တွန်းနေကြပါတယ်။