ပန်ဒါ အလုပ်သမားအရေး ဖြေရှင်းပေးဖို့ မန္တလေးတိုင်းအစိုးရကို တောင်းဆို

အလုပ်သမား ၂၀၀ ကျော် အလုပ်ထုတ်ခံရတာကို ပြေလည်အောင်ဖြေရှင်းပေးဖို့အတွက် ပုလိပ်မြို့ ပန်ဒါ ချည်မျှင်နဲ့ အထည်စက်ရုံက အလုပ်ထုတ်ခံခဲ့ရတဲ့ အလုပ်သမားတွေ စုပေါင်းပြီး မန္တလေးတိုင်းအစိုးရ အဖွဲ့ရုံးရှေ့မှာ ဒီနေ့ လာရောက်တောင်းဆိုခဲ့ကြပါတယ်။

မိသားစု ၅၀၀ ကျော် စားဝတ်နေရေး အခက်အခဲဖြစ်နေတာ တစ်လကျော်နေပြီဖြစ်တယ်လို့ အခြေခံအလုပ်သမား အဖွဲ့အစည်း(၁)ရဲ့ အတွင်းရေးမှူး ဒေါ်ဇာခြည်ဝင်း က RFA ကို ပြောပါတယ်။

“ပန်ဒါကုမ္ပဏီက ဝန်ထမ်းတွေရော၊ စက်ရုံရော လွှဲပြောင်းယူပြီးတော့ နိုင်ငံ့ဝန်ထမ်းဟောင်းတွေကိုတော့ အကြောင်းမရှိ အကြောင်းရှာဖြုတ်ပြီးတော့ ကျွမ်းကျင်မှု့မရှိတဲ့ ပုတ်ပြတ်၊ နေ့စားတွေကိုတော့ ၆ သောင်း၊ ၇ သောင်းနဲ့ လူရာနဲ့ချီပြီးခန့်နေပါတယ်။ အလွှဲပြောင်းခံ နိုင်ငံ့ဝန်ထမ်းတွေကိုတော့ ဖြုတ်ပြီးတော့ ဥပဒေမဲ့ လုပ်ရပ်တွေ လုပ်နေပါတယ်။ ဒုက္ခရောက်နေလို့ အခုလို ဝန်ကြီးချုပ်ကို လာတေ့ွရခြင်းဖြစ်ပါတယ်”

အလုပ်ထုတ်ခံရတဲ့ အလုပ်သမားအရေးနဲ့ ပတ်သက်လို့ ဝန်ကြီးချုပ်အနေနဲ့ ပြေလည်အောင် ဖြေရှင်းပေးဖို့အတွက် စာတင်တာ ၄  ကြိမ်ခန့်ရှိပြီဖြစ်ပေမဲ့ အခုအချိန်အထိ တွေ့ဆုံခွင့်မရသေးဘူးလို့ သိရပါတယ်။

အလုပ်သမား သဘောတူစာချုပ်ချုပ်ဖို့ သဘောတူပေမဲ့ မမျှတတဲ့စာချုပ်ကိုတော့ မချုပ်ဆိုနိုင်ဘူးလို့ ဒေါ်ဇာခြည်ဝင်း က ပြောပါတယ်။

အလုပ်သမား ၂၀၀ ကျော်ကို ပြီးခဲ့တဲ့ သြဂုတ်လက ဖြုတ်လိုက်တာဖြစ်လို့ မိသားစုတွေ စားဝတ်နေရေး ခက်ခဲနေတယ်လို့ သိရပါတယ်။

အလုပ်ခန့်ထားမှုဆိုင်ရာ စာချုပ်ချုပ်ဆိုမှု အဆင်မပြေတဲ့အတွက် ပန်ဒါ အလုပ်သမား ၂၀၀ ကျော်ဟာ ပြီးခဲ့တဲ့ သြဂုတ်လကလည်း ပလိပ်မြို့မှာ ဆန္ဒပြခဲ့ကြပါတယ်။