သူရဦးတင်ဦး ဈာပနကို ဒေါ်အောင်ဆန်းစုကြည် လွမ်းသူ့ပန်းခြင်းပို့

စစ်ကောင်စီရဲ့ ဖမ်းဆီးအကျဉ်းချခံထားရတဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က အမျိုးသားဒီမိုကရေစီအဖွဲ့ချုပ် (NLD) ပါတီ နာယက သူရတင်ဦးရဲ့ ဈာပနကို ဇွန်လ ၂ ရက်နေ့က လွမ်းသူပန်းခြင်း ပေးပို့ခဲ့ပါတယ်။

ဇွန်လ ၁ ရက်နေ့မှာ ကွယ်လွန်သွားတဲ့ သူရဦးတင်ဦး ရုပ်အလောင်းထားရှိရာ ဗဟန်းမြို့နယ်နေအိမ်မှာ ဒေါ်အောင်ဆန်းစုကြည်ရဲ့ လွမ်းသူ့ပန်းခြင်းကို စစ်ကောင်စီ တာဝန်ရှိသူတွေလာပို့သွားတာလို့ NLD ပါတီ ဗဟိုအလုပ်ကော်မတီဝင် ဦးကျော်ထွေးက RFA ကို ပြောပါတယ်။

ကွယ်လွန်ချိန်မှာ အသက် (၉၈) နှစ်ရှိပြီဖြစ်တဲ့ သူရဦးတင်ဦးရဲ့ ဈာပနအခမ်းအနားကို ဇွန်လ ၅ ရက်နေ့မှာ ရေဝေးသုသာန်မှာ ပြုလုပ်သွားမှာ ဖြစ်ပါတယ်။

သူရဦးတင်ဦးဟာ ၁၉၈၈ ခုနှစ် အမျိုးသားဒီမိုကရေစီအဖွဲ့ချုပ် (NLD) ပါတီစတင်ချိန်ကစပြီး ဒေါ်အောင်ဆန်းစုကြည်နဲ့အတူ ပူးပေါင်းပါဝင်လှုပ်ရှားခဲ့သူဖြစ်ပါတယ်။

သူရဦးတင်ဦးဟာ ၁၉၇၄ ခုနှစ် မတ်လ ၈ ရက်နေ့ကနေ ၁၉၇၆ ခုနှစ် မတ်လ ၆ ရက်နေ့အထိ တပ်မတော်မှာ စတုတ္ထမြောက် တပ်မတော်ကာကွယ်ရေးဦးစီးချုပ်အဖြစ် တာဝန်ယူခဲ့သူဖြစ်ပြီး တပ်မတော်မှာ နှစ်ပေါင်းသုံးဆယ်ကျော်ကြာ တာဝန်ထမ်းဆောင်ခဲ့သူဖြစ်ပါတယ်။