ဒေါ်အောင်ဆန်းစုကြည် အပ်နှင်းဆု ရုပ်သိမ်းဖို့ ကနေဒါ အောက်လွှတ်တော် ဆုံးဖြတ်

ကနေဒါ အောက်လွှတ်တော်က နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို အပ်နှင်းခဲ့တဲ့ ဂုဏ်ထူးဆောင် နိုင်ငံသားဆုကို ပြန်လည်ရုပ်သိမ်းဖို့ ကြာသပတေးနေ့ မနေ့က ဆုံးဖြတ်လိုက်ပါတယ်။

အဲဒီဆုကို ကနေဒါနိုင်ငံက ၂ဝဝ၇ ခုနှစ်မှာ ဒေါ်အောင်ဆန်းစုကြည်ကို ချီးမြှင့်ခဲ့တာပါ။ အခုလို အောက်လွှတ်တော်ရဲ့ ဆုံးဖြတ်ချက်ဟာ လက်တွေ့အကျိုးသက်ရောက်မှုတော့ မရှိသေးပါဘူး။ ဒီဆုကို ချီးမြှင့်ဖို့အတွက် ကနေဒါ အောက်လွှတ်တော်နဲ့ အထက်လွှတ်တော် ၂ ရပ်လုံးရဲ့ ထောက်ခံအတည်ပြုမှုနဲ့သာ ဆောင်ရွက်နိုင်သလို ရုပ်သိမ်းဖယ်ရှားမယ်ဆိုရင်လည်း အလားတူ လွှတ်တော် ၂ ခုလုံးက ဆုံးဖြတ်အတည်ပြုရမှာ ဖြစ်ပါတယ်။

ကနေဒါ ဝန်ကြီးချုပ် Justin Trudeau ဂျတ်စတင် ထရူးဒို က ဒေါ်အောင်ဆန်းစုကြည်ထံက ဂုဏ်ထူးဆောင်နိုင်ငံသား ဆု ပြန်လည်ရုပ်သိမ်းရေးကိစ္စဖြစ်ပေါ်နိုင်ပါတယ်လို့ ဗုဒ္ဓဟူးနေ့က ပြောကြားရင်း အဲဒီလို ရုပ်သိမ်းမှုကြောင့် မြန်မာနိုင်ငံက ရိုဟင်ဂျာ ပဋိပက္ခအဆုံးသတ်သွားမှာတော့ မဟုတ်ပါဘူးလို့ ပြောဆိုခဲ့ပါတယ်။

ကနေဒါ အောက်လွှတ်တော်က မြန်မာနိုင်ငံမှာ ရိုဟင်ဂျာတွေကို လုံခြုံရေးတပ်ဖွဲ့တွေက သတ်ဖြတ်ညှဉ်းပမ်းခဲ့မှုတွေ ဟာ Genocide လူမျိုးတုံးသတ်ဖြတ်မှုဖြစ်တယ်လို့ ပြီးခဲ့တဲ့ အပတ်က ဆုံးဖြတ်ခဲ့ပါတယ်။