စားသုံးသူများ ကာကွယ်ရေးအသင်း ဖွဲ့စည်း

စားသုံးသူ ကာကွယ်ရေးအသင်းအနေနဲ့ ဈေးကွက်ထဲမှာ ရှိနေတဲ့ ကုန်ပစ္စည်းတွေကို စစ်ဆေးမှုတွေ ပြုလုပ်သွားမှာဖြစ်ပြီး ပြည်ပကနေ တင်သွင်းလာတဲ့ စားသုံးဆီ၊ ဆေးဝါးစတာတွေကို သေသေချာချာ စိစစ် ကြီးကြပ်စစ်ဆေးပေးဖို့ သက်ဆိုင်ရာ ဝန်ကြီးဌာနတွေကို တိုက်တွန်း ပြောဆိုသွားမယ်လို့ စားသုံးသူများ ကာကွယ်ရေးအသင်း ကော်မတီဝင် ဗကသ ကျောင်းသားဟောင်း ဦးကံညွှန့်က RFA ကို အခုလို ပြောပါတယ်။

အသင်းအနေနဲ့ တရားဝင်မှတ်ပုံတင် ရရှိတဲ့ အဖွဲ့အစည်းတစ်ခု အနေနဲ့ ရပ်တည်သွားမှာဖြစ်ပြီး လတ်တလော ရန်ကုန်မြို့တွင်းက အခြေခံပညာ ကျောင်းတွေမှာ ရောင်းချနေတဲ့ စားသောက်ကုန်တွေကို စစ်ဆေးတာ၊ ရောင်းချသူတွေကို အသိပညာ ပေးတာ စတဲ့ လုပ်ငန်းတွေကို ကျန်းမာရေးဝန်ကြီးဌာန၊ ပညာရေး ဝန်ကြီးဌာန၊ ပြည်ထဲရေး ဝန်ကြီးဌာန စတဲ့ ဝန်ကြီးဌာနတွေနဲ့ ပူပေါင်းလုပ်ဆောင်သွားဖို့ ရှိပြီး မီဒီယာတွေက တဆင့်လည်း ပြည်သူကို အသိပေးဖို့ ရှိတယ်လို့ သိရပါတယ်။

မနေ့က ကျင်းပခဲ့တဲ့ စားသုံးသူများ ကာကွယ်ရေးအသင်း ဖွဲ့စည်းခြင်း အခမ်းအနားကို NLD ပါတီဝင်တွေအပြင် အနုပညာရှင်တွေဖြစ်တဲ့ ဆောင်းဦးလှိုင်၊ သျှီ၊ စာရေးဆရာ နွမ်ဂျာသိုင်း၊ ကျောင်းသား သမဂ္ဂများ ပေါ်ပေါက်ရေး ဆောင်ရွက်နေသူ ကိုစည်သူမောင်၊ လူမှုရေး အသင်းအဖွဲ့ အသီးသီးက ပုဂ္ဂိုလ်တွေ တက်ရောက်ခဲ့ကြပါတယ်။

အဲဒီအသင်းမှာ လောလောဆယ်အထိ အသင်းဝင် ၂၀၀ နီးပါး ရှိနေပြီဖြစ်ပြီး နောက်လာမယ့် အစည်းအဝေးမှာ ဗဟို အလုပ်အမှုဆောင် ကော်မတီကို ရွေးချယ် ဖွဲ့စည်းသွားဖို့ ရှိတယ်လို့လည်း သိရပါတယ်။