လွှတ်တော်ကို ဝေဖန်သူ ဒေါက်တာဆိတ်ဖွား ဖော်ထုတ် စုံစမ်းရေး ကော်မရှင် ဖွဲ့စည်းပြီ

ပြည်ထောင်စုလွှတ်တော် နာယက ဦးခင်အောင်မြင့် က ဒေါက်တာဆိတ်ဖွား ဖော်ထုတ်ဖို့ စုံစမ်းရေးကော်မရှင် ဖွဲ့စည်းတာနဲ့ ပတ်သက်ပြီး လွှတ်တော်မှာ အသိပေးကြေညာသွားပါတယ်။

အဲဒီစုံစမ်းရေးကော်မရှင်မှာ အမျိုးသားလွှတ်တော် ဒုတိယဥက္ကဌ ဦးမြငြိမ်း၊ ပြည်သူ့လွှတ်တော် ဒုတိယဥက္ကဌ ဦးနန္ဒကျော်စွာ၊ ပြည်သူ့လွှတ်တော် ကိုယ်စားလှယ် ဒေါက်တာစိုးရင်၊ သင်္ဃန်းကျွန်း မဲဆန္ဒနယ်မှ ပြည်သူ့လွှတ်တော် ကိုယ်စားလှယ် ဦးသိန်းညွှန့်၊ အမျိုးသားလွှတ်တော် ကိုယ်စားလှယ် ဒေါက်တာမြတ်ဉာဏစိုး၊ အမျိုးသားလွှတ်တော် ကိုယ်စားလှယ် ဦးဖုန်းမြင့်အောင်တို့ ပါဝင်တဲ့ လွှတ်တော် ကိုယ်စားလှယ် ၁၇ ဦးနဲ့ မနေ့က ဖွဲ့စည်းလိုက်တာဖြစ်ပါတယ်။

ကော်မတီသက်တမ်းအတွက် ပြည်ထောင်စုလွှတ်တော်ကို  အစီရင်ခံစာတင်ပြပြီး လွှတ်တော်ရဲ့ဆုံးဖြတ်ချက်နဲ့ ညွှန်ကြားချက်အတိုင်း ဆောင်ရွက်ပြီးတဲ့အထိ တာဝန်ယူရမှာ ဖြစ်တယ်လို့ ဆိုပါတယ်။

အင်တာနက်ပေါ်ကနေ (Above The Law) ဆိုတဲ့ ခေါင်းစဉ်နဲ့ လွှတ်တော်ကို ဝေဖန်ရေးသားတဲ့ ဒေါက်တာဆိတ်ဖွား ဆိုသူကို အရေးယူပေးဖို့ ပြီးခဲ့တဲ့ ဇန်နဝါရီလ ၁၇ ရက်နေ့က ကျင်းပခဲ့တဲ့ ပြည်ထောင်စုလွှတ်တော်မှာ ကမာရွတ် မဲဆန္ဒနယ်က လွှတ်တော်ကိုယ်စားလှယ် ဒေါက်တာစိုးရင် က အရေးကြီးအဆိုအဖြစ် တင်သွင်းခဲ့တာပါ။

အင်တာနက် ဆောင်းပါးရှင် ဒေါက်တာဆိတ်ဖွား ဆိုသူကို ဖော်ထုတ်နိုင်ဖို့အတွက် စုံစမ်းရေးကော်မရှင်ကို  ပြည်ထောင်စုလွှတ်တော် အစည်းအဝေးမှာ ဖွဲ့စည်းခဲ့တာနဲ့ ပတ်သက်ပြီး အဖွဲ့ဝင်တွေရဲ့ သဘောထားတွေကို RFA သတင်းထောက် မဇင်မာဝင်း က စုစည်းတင်ပြထားပါတယ်။

	အသံဖိုင်နားထောင်ရန်
	အသံဖိုင်ယူရန်။