မြန်မာပြည်ငြိမ်းချမ်းရေး ကာဒီနယ် ချားလ်စ်မောင်ဘို ဆုတောင်းပေး

မြန်မာနိုင်ငံ ငြိမ်းချမ်းရေးအတွက် ကက်သလစ် ခရစ်ယာန်ဂိုဏ်းချုပ် ဘုန်းတော်ကြီး ကာဒီနယ် ချားလ်စ်မောင်ဘိုက ဆုတောင်းပေးခဲ့တယ်လို့ Vatican News က ဖေဖော်ဝါရီ ၁၀ ရက်နေ့မှာ ဖော်ပြပါတယ်။

ချင်းပြည်နယ် မင်းတပ်မြို့က ကက်သလစ် ဘုရားကျောင်းတစ်ခုကို စစ်ကောင်စီတပ်က ဖေဖော်ဝါရီ ၆ ရက်နေ့မှာ လေကြောင်းက ဗုံးကြဲတိုက်ခိုက်ခဲ့ပြီးနောက် ဖေဖော်ဝါရီ ၉ ရက်နေ့က အခုလို ဆုတောင်းပေးခဲ့တာပါ။

“The Sacred Heart of Jesus” ကက်သလစ်ဘုရားကျောင်းကို ဗုံးကြဲခံရတာကြောင့် အမိုးနဲ့ မှန်ပြတင်းပေါက်တွေ ထိခိုက်မှုရှိခဲ့ပြီး လူသေဆုံးမှုတော့ မရှိခဲ့ဘူးလို့ ဆိုပါတယ်။

ဒီဇင်ဘာလ ၂၄ ရက်နေ့ကလည်း စစ်ကောင်စီတပ်သားတွေရဲ့ ပစ်ခတ်မှုကြောင့် မင်းတပ်မြို့က ခရစ်ယာန်သင်းအုပ် ဆရာတစ်ဦး သေဆုံးခဲ့တယ်လို့ ဒေသခံတွေက ပြောပါတယ်။

RFA က ရရှိထားတဲ့ အချက်အလက်တွေအရ နိုင်ငံတစ်ဝန်းမှာ စစ်ကောင်စီတပ်ရဲ့ လေကြောင်းတိုက်ခိုက်မှုကြောင့် ဘာသာရေး အဆောက်အအုံ ရှစ်ရာနီးပါး ထိခိုက်ပျက်စီးခဲ့ပါတယ်။

ပျက်စီးခဲ့ရတဲ့ ဘာသာရေး အဆောက်အအုံတွေထဲမှာ ဗုဒ္ဓဘာသာ ဘုန်းကြီးကျောင်းနဲ့ ဓမ္မာရုံတွေအပြင် ခရစ်ယာန်ဘုရားကျောင်းနဲ့ ဗလီတွေလည်း ပါဝင်ပါတယ်။

ချားလ်စ်မောင်ဘိုဟာ မြန်မာနိုင်ငံမှာ အကြမ်းဖက်မှုတွေ ချက်ချင်းရပ်ဖို့နဲ့ အမျိုးသားပြန်လည်သင့်မြတ်ရေးကို လုပ်ဆောင်ဖို့ ပြီးခဲ့တဲ့ ဇန်နဝါရီလဆန်းက သူရဲ့ နှစ်သစ်ကူး သဝဏ်လွှာမှာလည်း တိုက်တွန်းခဲ့ပါတယ်။