ဗိုလ်ချုပ် အောင်ဆန်း၏ ဆောင်းပါးစာမူခကို နိုင်ငံရေးအကျဉ်းသားများအားလှူ
အမျိုးသားခေါင်းဆောင် ဗိုလ်ချုပ်အောင်ဆန်းရဲ့ အကြောင်းကို စာရေးဆရာ ကိုအောင်ဆန်း ဆိုတဲ့ အမည်နဲ့ စာရေးဆရာ၊ ကဗျာဆရာတွေ ဝိုင်းဝန်း ရေးသားပြီး ဖေဖော်ဝါရီလ ၁၃ ရက်နေ့က ရန်ကုန်မြို့မှာ ထုတ်ဝေ ဖြန့်ချိလိုက်တဲ့အတွက် ထုတ်ဝေသူနဲ့ စာရေးဆရာတွေကို ဒေါ်အောင်ဆန်းစုကြည်က ကျေးဇူးတင်စကား ပြောဆိုလိုက်ပါတယ်။
-
2011-02-18 -
-
-
ဒါ့အပြင် အဲဒီစာအုပ်ထဲမှာ ဗိုလ်ချုပ်အောင်ဆန်း ကိုယ်တိုင်ရေးခဲ့တဲ့ ဆောင်းပါးကို ပြန်လည် ဖော်ပြ ထားတဲ့အတွက် ထုတ်ဝေသူက ဆောင်းပါးရှင် ဗိုလ်ချုပ်အောင်ဆန်းအတွက် ဉာဏ်ပူဇော်ခအဖြစ် ကျပ်ငွေ ၁ သိန်း ကို ကျန်ရစ်တဲ့ မိသားစုဝင် ဖြစ်တဲ့ ဒေါ်အောင်ဆန်းစုကြည်ကို ပေးပါတယ်။
ဒါပေမဲ့ ဗိုလ်ချုပ်အောင်ဆန်း မှာ သားတယောက်၊ သမီးတယောက် ကျန်ခဲ့တဲ့အတွက် သမီးတယောက်တည်းက လက်ခံယူရင် မတရားလို့ ဒေါ်အောင်ဆန်းစုကြည်က အဲဒီ စာမူခကို လက်မခံပဲ တခြား ချို့တဲ့တဲ့ စာရေးဆရာ တယောက်ယောက်ကို လှူလိုက်ဖို့ ပြောတယ်လို့ ဒီနေ့ ဒေါ်အောင်ဆန်းစုကြည်၊ ဦးတင်ဦးနဲ့ ဦးဝင်းတင် တို့ကို စာအုပ် လက်ဆောင် သွားပေးခဲ့တဲ့ ကဗျာငြိမ်းသစ်က RFA ကို ပြောပါတယ်။
အဲဒီဉာဏ်ပူဇော်ခကို NLD က ဆောင်ရွက်နေတဲ့ နိုင်ငံရေးအကျဉ်းသား ကူညီေ စာင့်ရှောက်ရေး အဖွဲ့ကို လှူဒါန်းလိုက်တယ်လို့ ဆရာငြိမ်းသစ်က ဆက်ပြောပါတယ်။
ဒီစာအုပ်ကို ပိတောက်ပွင့်သစ် မဂ္ဂဇင်းအယ်ဒီတာချုပ် ကဗျာဆရာမောင်စိမ်းနီက စီစဉ် ထုတ်ဝေတာပါ။ ဖေဖော်ဝါရီလ ၁၃ ရက်နေ့ဗိုလ်ချုပ်အောင်ဆန်းရဲ့ ၉၆ နှစ်မြောက် မွေးနေ့က City Star မှာ စာအုပ် မိတ်ဆက်ပွဲ ပြုလုပ်ခဲ့ပါတယ်။ စာအုပ်ကို အုပ်ရေ တထောင် ရိုက်နှိပ်ပြီး၊ တအုပ်ကို စာအုပ်တိုက်ဖြန့်ချိ ဈေး တသောင်းဖြစ်ပါတယ်။ စာအုပ်ဆိုင်တွေ မှာ ၁၂၀၀၀ နဲ့ ပြန်ရောင်းချပြီး အဲဒီ ဖြန့်ချိတဲ့ နေ့မှာပဲ စောင်ရေ တထောင်လုံး ရောင်းကုန် သွားတယ်လို့ ဆိုပါတယ်။
ဒါကြောင့် စာရေးဆရာ ကိုအောင်ဆန်း ဆိုတဲ့ စာအုပ်ကို နောက်ထပ် ဒုတိယအကြိမ်အဖြစ် ပုံနှိပ် ဖြန့်ချိနိုင်အောင် ကြိုးစားနေတယ်လို့လည်း သိရပါတယ်။