ဗိုလ်ချုပ်ကြေးရုပ် လွိုင်ကော်ရောက်ရှိ

2019.01.29

ကယားပြည်နယ် လွိုင်ကော်မြို့ ကန္ဒာဟေဝန်ပန်းခြံမှာထားမယ့် ဗိုလ်ချုပ်ကြေးရုပ်တုကို တွေ့ရစဉ်

Photo: Thiha Tun/RFA

ဗိုလ်ချုပ်အောင်ဆန်းကြေးရုပ် ထားရှိမယ့်အစီအစဉ်နဲ့ ပတ်သက်လို့ ကန့်ကွက်မှုတွေရှိနေတဲ့ ကယားပြည်နယ်၊ လွိုင်ကော်မြို့မှာ ဒီနေ့နေ့လယ်ပိုင်းက ကန္တာဟေဝန်ပန်းခြံမှာ ဗိုလ်ချုပ်ကြေးရုပ်တု စိုက်ထူလိုက်ပြီဖြစ်ပါတယ်။

ဒီကိစ္စနဲ့ပတ်သက်ပြီး ကန့်ကွက်ခဲ့တဲ့ ကရင်နီလူငယ်တွေထဲက တစ်ဦးဖြစ်တဲ့ ကယန်းအမျိုးသားပါတီ ဥက္ကဋ္ဌ ခွန်းဘီထူး က ပြည်နယ်အစိုးရအနေနဲ့ အခုလိုအတင်းအဓမ္မ လုပ်ဆောင်လာတာတွေကို ပြန်လည်တုံ့ပြန်သွားမယ်လို့ ပြောပါတယ်။

ကြေးရုပ်ထားရှိမယ့်ကိစ္စနဲ့ ပတ်သက်ပြီး လွိုင်ကော်မြို့မှာ ကန့်ကွက်ဆန္ဒပြမှုတွေ ဖြစ်ခဲ့ပြီးနောက် ၂၀၁၈ ဇူလိုင်လ ၂၃ ရက်နေ့မှာ ပြည်နယ်အစိုးရက ဖွဲ့စည်းထားတဲ့ ရုပ်တုဖြစ်မြောက်ရေးကော်မတီကို ဖျက်သိမ်းလိုက်ပြီး ဒေသခံတွေ၊ လူမှုရေးအဖွဲ့တွေ ပါဝင်တဲ့ ကော်မတီအသစ်ဖွဲ့ပြီး ဆက်လက်လုပ်ဆောင်သွားမယ်လို့ ပြည်နယ်ဝန်ကြီးချုပ်က သတင်းစာရှင်းလင်းပွဲမှာ ပြောခဲ့ပါတယ်။

ဒီနေ့ကြေးရုပ်ထားရှိတဲ့ကိစ္စနဲ့ ပတ်သက်လို့ ပြည်နယ်အစိုးရအဖဲ့ွကို RFA က ဆက်သွယ်ပေမယ့် ဆက်သွယ်လို့ မရခဲ့ပါဘူး။

အဲဒီကြေးရုပ်တုကို အများပြည်သူထည့်ဝင်လှူဒါန်းငွေနဲ့ ပြည်နယ်အစိုးရအဖွဲ့ရဲ့ အထွေထွေပိုလျှံရန်ပုံငွေတွေ စုပေါင်းပြီး ဆောက်လုပ်သွားမှာဖြစ်ပြီး ငွေကျပ်သိန်း ၈ဝဝ ကုန်ကျခံဆောက်လုပ်သွားမှာဖြစ်တယ်လို့လည်း သိရပါတယ်။

အဲဒီရုပ်ထုထားရှိမယ့်ကိစ္စကို လွိုင်ကော်မြို့မှာ ကန့်ကွက်ဆန္ဒပြခဲ့တာကြောင့် လူငယ် ၁၂ ယောက် ငြိမ်းစုစီ ဥပဒေပုဒ်မ ၁၉ နဲ့ တရားစွဲဆိုခံထားရသလို လူငယ် ၈ ယောက်ဟာလည်း ကရင်နီသမိုင်းကြောင်း စာတွေဖြန့်ဝေ ခဲ့တာကြောင့်ဆိုပြီး လွိုင်ကော်၊ ဒီမောဆိုး၊ ဖရူဆို၊ ဖားဆောင်းနဲ့ ဘောလခဲမြို့နယ်တွေမှာ ရာဇသတ်ကြီး ပုဒ်မ ၅၀၅ (ခ) (ဂ) တွေနဲ့ တရားစွဲဆိုခံထားရပါတယ်။

ဒီသတင်းကို RFA သတင်းထောက် မသီရိမင်းဇင် ပေးပို့တာပါ။

ဆက်နွယ်သောသတင်းများ

သတင်းများ

ဖတ်ရှုသူအများဆုံး သတင်းများ။

RFA

ဒေါ်အောင်ဆန်းစုကြည်ကို ၂၀၂၅ ခုနှစ် ပြည်သူ့ဂုဏ်ရည်ဆု ချီးမြှင့်

ဖတ်ရှုသူအများဆုံး သတင်းများ။

သတင်းများ

ငလျင်ဘေးသင့်ပြည်သူ ၄ဝ,ဝဝဝ ကျော် ယာယီ အမိုးအကာတွေ နဲ့ နေထိုင်နေရ