ကျောင်းသားသမဂ္ဂ တရားဝင် ရပ်တည်ရေး ဗကသ တောင်းဆိုမည်

ဗမာနိုင်ငံလုံးဆိုင်ရာ ကျောင်းသားသမဂ္ဂများအဖွဲ့ချုပ်က ကျောင်းသားသမဂ္ဂ တရားဝင် ဖွဲ့စည်းရပ်တည်နိုင်ရေး အတွက် တောင်းဆိုသွားမယ်လို့ အထက်မြန်မာပြည် ဗ က သ အဖွဲ့ဝင် ကျောင်းသားတွေက ပြောပါတယ်။

မန္တလေးမြို့ ချမ်းမြသာစည်မြို့နယ် ကံတက်ကုန်း မစိုးရိမ်ကျောင်းတိုက်မှာ ဒီကနေ့ ကျင်းပတဲ့ ဗ က သ များ အဖွဲ့ချုပ်ညီလာခံကြီး ပေါ်ပေါက်လာဖို့အတွက် အကြိုဆွေးနွေး ပွဲမှာ အထက်မြန်မာပြည် ဗ က သ ဒု-ဥက္ကဌ ကိုဉာဏ်ထက်က အခုလို ပြောကြား ခဲ့ပါတယ်။

"တောင်းဆိုချက် ၁၁ ချက်ကတော့ ခုချိန်ထိဘာမှမရသေးဘူးပေါ့၊ မရသေးတဲ့အပေါ်မှာ နိုင်ငံရေးတောင်းဆိုချက်၊ ပညာရေးတောင်းဆိုချက်ဆိုပြီး ကျနော်တို့ ထွက်ဖို့ရှိတယ်၊ အဲ့ပညာရေးတောင်းဆိုချက်ထဲမှာ ၁၁ ချက်နဲ့ ပတ်သက်ပြီး ကျနော်တို့ရှင်းလင်း ဖို့ရှိပါတယ်၊ ၁၁ ချက်ထဲမှာ ကျနော်တို့အဓိကတောင်းဆိုမယ့် အရာတွေကတော့ သမဂ္ဂတရားဝင်ဖော်ထုတ် ရပ်တည်ခွင့်ရရှိရေးကို အဓိကတောင်းသွားမှာဖြစ်ပါတယ်"

ညီလာခံမှာ ရှေ့ဆက်လုပ်ဆောင်မယ့် ဒီမိုကရေစီပညာရေးတောင်းဆိုမှုတွေ၊ ကျောင်းသားထု အခွင့်အရေးတွေနဲ့ သာယာဝတီအကျဉ်းထောင်ကိုရောက် ရှိနေတဲ့ ကျောင်းသားတွေပြန်လွှတ်ပေးရေးတွေကို အဓိကထား ဆွေးနွေးသွားမယ်လို့ သိရပါတယ်။ မန္တလေးခရိုင်၊ မြင်းခြံ၊ မကွေး၊ မုံရွာ၊ ဗန်းမော်၊ မြစ်ကြီးနား အပါအဝင် ခရိုင် ၁၁ ခုက ဗ က သ များ အဖွဲ့ချုပ် အဖွဲ့ဝင်တွေအပြင် ရှမ်းနဲ့ ကယားပြည်နယ်က ကိုယ်စားပြု ရောက်ရှိလာတဲ့ တက္ကသိုလ် ကျောင်းသား စုစုပေါင်း ၁၀၀ ခန့်က ညှိုနှိုင်းဆွေးနွေးခဲ့ကြတာဖြစ်ပါတယ်။

အဲဒီ အကြိုညီလာခံကို နှစ်ရက်အကြာပြုလုပ်သွားမှာဖြစ်ပြီး အဆုံးအဖြတ် သဘော တူညီမှုတွေကို မနက်ဖြန် ဒီဇင်ဘာ ၂၁ ရက်နေ့မှာ ထုတ်ပြန်ကြေညာ သွားမယ်လို့ သိရပါတယ်။