တိုင်းဒေသကြီး အစိုးရအဖွဲ့က ဘာသာပေါင်းစုံ ချစ်ကြည်ရေး အဖွဲ့ကို ဖွဲ့စည်း

• 
  2013-10-27

ဧရာဝတီတိုင်းဒေသကြီး၊ ပုသိမ်မြို့ပေါ်မှာ တိုင်းဒေသကြီးအစိုးရအဖွဲ့က ဘာသာပေါင်းစုံ ချစ်ကြည်ရေးအဖွဲ့ကို ဖွဲ့လိုက်ပြီဖြစ်တဲ့အတွက် ဒေသခံရပ်မိရပ်ဖတွေ စုပေါင်းဖွဲ့စည်းထားတဲ့ ဘာသာပေါင်းစုံ ချစ်ကြည်ရေးအဖွဲ့ကို ဒီနေ့မှာ ဖျက်သိမ်းလိုက်ပြီလို့ သိရပါတယ်။

အဲဒီဒေသမှာဘာသာရေး ပြဿနာတစုံတခုဖြစ်ခဲ့ရင် ဒေသခံတွေကို အကူအညီပေးတာနဲ့ပတ်သက်ပြီး မလိုလားအပ်တဲ့ ပြဿနာတွေမဖြစ်ရအောင် အခုလိုဆောင်ရွက်ရတာဖြစ်တယ်လို့ အခုဖျက်သိမ်းလိုက်တဲ့အဖွဲ့က ဦးကြည်လွင်ကပြောပါတယ်။

ဘာသာပေါင်းစုံ ချစ်ကြည်ရေးအဖွဲ့ကို ဒေသခံရပ်မိရပ်ဖတွေက ပြီးခဲ့တဲ့ ဧပြီလ ၈ ရက်နေ့က စတင်ဖွဲ့ စည်းခဲ့တာဖြစ်ပြီး တိုင်းဒေသကြီးအစိုးရက အခုလ ၆ ရက်နေ့မှာ ဖွဲ့စည်းခဲ့တာပါ။

အခုဖျက်သိမ်းလိုက်တဲ့ ဘာသာပေါင်းစုံ ချစ်ကြည်ရေးအဖွဲ့မှာ အမျိုးသားဒီမိုကရေစီကွန်ရက်၊ လူ့အခွင့်အရေး ကာကွယ်စောင့်ကြည့်ရေးကွန်ရက်နဲ့ အမေ့ကြယ်ပွင့်လေးများကွန်ရက်တို့က အဖွဲ့ ဝင်တွေနဲ့ဒေသခံတွေ ပါဝင်ခဲ့ကြပါတယ်။

ဒါပေမဲ့ တိုင်းဒေသကြီးအစိုးရအဖွဲ့က ဖွဲ့စည်းလိုက်တဲ့ ဘာသာပေါင်းစုံ ချစ်ကြည်ရေးအဖွဲ့မှာတော့ ဒေသခံတွေပါဝင်မှုမရှိဘူးလို့ သိရပါတယ်။