ကျောက်ကြီးမှာ လက်နက်ကြီးကြောင့် နှစ်ဦး သေ၊ လေးဦး ဒဏ်ရာရ

ပဲခူးတိုင်း၊ ကျောက်ကြီးမြို့နယ်မှာ ဇူလိုင်လ ၁ ရက်နေ့ ညပိုင်းက မုန်းမြို့အခြေစိုက် စစ်ကောင်စီရဲ့ ခမရ (၅၉၀) တပ်ရင်းက ပစ်ခတ်တဲ့ လက်နက်ကြီးကြောင့် အရပ်သားနှစ်ဦး သေဆုံးပြီး လေးဦး ဒဏ်ရာရခဲ့တယ်လို့ အမျိုးသားညီညွတ်ရေးအစိုးရ (NUG) ကာကွယ်ရေးဝန်ကြီးဌာနရဲ့ တောင်းပိုင်းတိုင်း စစ်ဒေသက ထုတ်ပြန်ပါတယ်။

စစ်ကောင်စီတပ်ရဲ့ လက်နက်ကြီးဟာ နောင်ချိုရွာထဲကို ကျရောက်ပေါက်ကွဲခဲ့လို့ အရပ်သားတွေ ထိခိုက်သေဆုံးခဲ့တာဖြစ်ပြီး တိုက်ပွဲဖြစ်တာမရှိဘဲ ပစ်ခတ်ခဲ့တာလို့ ဆိုပါတယ်။

အခု ထိခိုက်သေဆုံးသူတွေရဲ့ အသေးစိတ်အချက်အလက်တွေကိုတော့ တောင်ပိုင်းတိုင်း စစ်ဒေသက ထုတ်ပြောထားတာ မရှိပါဘူး။

ဇွန်လ ၂၅ ရက်နေ့နဲ့ ၂၉ ရက်နေ့တွေမှာတော့ ကျောက်ကြီးမြို့နယ်၊ သမင်အင်းကုန်းရွာထဲကို စစ်ကောင်စီတပ်က ပစ်ခတ်တဲ့ လက်နက်ကြီးကျည်တွေ ကျရောက်ပေါက်ကွဲတာကြောင့် အရပ်သားလေးဦး ဒဏ်ရာရခဲ့တယ်လို့ ကရင်အမျိုးသားအစည်းအရုံး (KNU) က ထုတ်ပြန်ထားပါတယ်။

ဒီအခြေအနေတွေနဲ့ ပတ်သက်လို့ စစ်ကောင်စီဘက်က တစ်စုံတစ်ရာ တုံ့ပြန်ပြောဆိုလာတာ မတွေ့ရသေးပါဘူး။

ဇွန်လ ၂၈ ရက်နေ့ကလည်း ပဲခူးတိုင်း၊ ကျောက်ကြီးမြို့နယ်မှာ စစ်ကောင်စီတပ်ရဲ့ ဒရုန်းဗုံးပစ်ခတ်မှုကြောင့် အရပ်သားခုနစ်ဦး သေဆုံးခဲ့တယ်လို့ ဒေသခံတွေက ပြောပါတယ်။

အာဏာသိမ်းသုံးနှစ်ကျော်အတွင်း တိုက်ပွဲတွေကြောင့် ကရင်အမျိုးသားအစည်းအရုံး (KNU) ထိန်းချုပ်နယ်မြေတွေမှာ လာရောက်ခိုလှုံနေတဲ့ စစ်ဘေးဒုက္ခသည် တစ်သန်းကျော်ရှိလာတယ်လို့ KNU ဗဟိုက ဇွန်လ ၂၀ ရက်နေ့မှာ သတင်းထုတ်ပြန်ထားပါတယ်။