ထန်းတပင်မှာ လက်နက်ကြီးကြောင့် လေးဦးသေ၊ သုံးဦးဒဏ်ရာရ

ပဲခူးတိုင်း ထန်းတပင်မြို့နယ် ရွာလေးကုန်းရွာကို စစ်ကောင်စီတပ်က မေလ ၁၃ ရက်နေ့ ညပိုင်းမှာ လက်နက်ကြီးနဲ့ ပစ်ခတ်တာကြောင့် အရပ်သား လေးဦးသေဆုံးပြီး သုံးဦး ဒဏ်ရာရသွားတယ်လို့ ကရင်အမျိုးသားအစည်းအရုံး (KNU) က ထုတ်ပြန်ပါတယ်။

ဇရပ်ကြီးရွာအခြေစိုက် စစ်ကောင်စီရဲ့ ခလရ-၇၃ ကနေ လက်နက်ကြီးတွေနဲ့ပစ်ခတ်တာမှာ ရွာလေးရွာထဲကို ကျရောက်ပေါက်ကွဲခဲ့လို့ အရပ်သားတွေ ထိခိုက်သေဆုံးရတာလို့ KNU က ပြောပါတယ်။

သေဆုံးသူတွေက အသက် ၈၄ နှစ်အရွယ် ဦးကျော်စိန်၊ အသက် ၅၂ အရွယ် ဒေါ်ဌေးရီ၊ အသက် ၄၉ နှစ်အရွယ် ဦးဌေးနိုင်နဲ့ အသက် ၁၈ နှစ်အရွယ် မအိဖူးသော်တို့ဖြစ်ပြီး နောက်ထပ်ကျေးရွာသား သုံးဦးကတော့ ထိခိုက်ဒဏ်ရာရခဲ့တယ်လို့ ဆိုပါတယ်။

ဒီကိစ္စနဲ့ပတ်သက်လို့ တုံ့ပြန်ချက်ရနိုင်ဖို့ စစ်ကောင်စီရဲ့ ပဲခူးတိုင်းပြောခွင့်ရသူ တိုင်းစီးပွားရေးဝန်ကြီး ဦးတင်ဦးကို RFA က တယ်လီဖုန်းနဲ့ဆက်သွယ်ခဲ့ပေမဲ့ လက်ခံဖြေဆိုတာမရှိပါဘူး။

မေလ ၅ ရက်နေ့ကလည်း ကရင်ပြည်နယ် သံတောင်ကြီးမြို့နယ်အတွင်းက လူနေရပ်ရွာတွေထဲကို စစ်ကောင်စီတပ်က လေကြောင်းကနေ ပစ်ခတ်တိုက်ခိုက်လို့ ကလေးတစ်ဦး သေဆုံးပြီး သုံးဦး ဒဏ်ရာရခဲ့တယ်လို့ KNU က ထုတ်ပြန်ထားပါတယ်။

RFA က ပြုစုထားတဲ့စာရင်းအရ စစ်ကောင်စီတပ်ရဲ့ လေကြောင်းနဲလက်နက်ကြီးကြောင့် ၂၀၂၄ ခုနှစ် ဇန်နဝါရီလကနေ မတ်လအထိ သုံးလအတွင်းမှာ သေဆုံးသူ ၃၉၇ ဦးရှိခဲ့ပြီး ဒဏ်ရာရသူက ၈၈၉ ဦးအထိ ရှိခဲ့ပါတယ်။