တပ်မတော်နဲ့ AA တိုက်ပွဲဖြစ်၊ ဒေသခံတွေ ထွက်ပြေးတိမ်းရှောင်

ပေါက်တောပြင်ဘက်မှာဆိုရင် မကြာခဏ တိုက်ပွဲတွေဖြစ်လို့ ရွာသူရွာသားတွေဟာ ရွာနဲ့ ၅ မိုင်ခန့် ဝေးပြီး တပ်မတော်စစ်ကြောင်းတွေ သွားလာမှုနည်းတဲ့ မြောက်ဦးမြို့နယ်ထဲကပဲ ဘုရားလှနဲ့ ကုလားချောင်းကျေးရွာတွေ ဘက်ကို သွားရောက်နေထိုင်နေကြတာ ၄ လခန့်ရှိနေပြီလို့ ပြောပါတယ်။

တပ်မတော်နဲ့ AA တို့ကြား ရခိုင်ပြည်နယ်အတွင်းတိုက်ပွဲတွေဟာ အရင်ကထက်စာရင် အခုလအတွင်း နည်းပါးလာတယ်လို့ ဗိုလ်မှူးကြီးဝင်းဇော်ဦး က ပြောပါတယ်။

AA အပါအဝင် မြောက်ပိုင်းလက်နက်ကိုင်အဖွဲ့တွေနဲ့ အစိုးရတို့ကြား တွေ့ဆုံဆွေးနွေးမှုတွေရှိနေတာကြောင့် တိုက်ပွဲတွေ လျော့လာတာလို့ ပြောနိုင်မလားလို့ မေးကြည့်တော့ စစ်ဆင်ရေးလုပ်တဲ့ တပ်တွေဖြစ်တာကြောင့် အဲဒီအပိုင်းကို မသိကြောင်း ဗိုလ်မှူးကြီးဝင်းဇော်ဦး ကပြောပါတယ်။

တိုက်ပွဲဖြစ်ပွားတာနဲ့ ပတ်သက်လို့ ရခိုင်တပ်မတော် AA ရဲ့ ပြောရေးဆိုခွင့်ရှိသူ ခိုင်သုခကို RFA က ဖုန်းနဲ့ အကြိမ်ကြိမ်ဆက်သွယ်မေးမြန်းခဲ့ပေမယ့် ဖုန်းလက်ခံဖြေကြားတာမရှိပါဘူး။

ရခိုင်ပြည်နယ်မှာ ပြီးခဲ့တဲ့နှစ် ဒီဇင်ဘာလလောက်ကနေ ဒီနေ့အထိ အစိုးရတပ်မတော်နဲ့ ရခိုင်တပ်မတော်တို့ရဲ့ နှစ်ဘက်တိုက်ပွဲတွေကြောင့် သေဆုံးသူ အရပ်သား ၄၀ နီးပါးအထိ ရှိနေပြီဖြစ်ပြီ ထိခိုက်ဒဏ်ရာရသူ ၇၀ ကျော်အထိ ရှိလာနေပြီဖြစ်ပါတယ်။

ဒီသတင်းကို RFA သတင်းထောက် မဝေမာထွန်း ပေးပို့တာပါ။