ကျောက်တော်မှာ စစ်ဘေးဒုက္ခသည် ၄၀၀ ကျော်ထိရှိလာ


2018.12.20
kyauktaw-refugees-622.jpg ကျောက်တော်မြို့နယ် ကန်စောက်ရွာမှာ စစ်ပြေးဒုက္ခသည်တွေကို ၂၀၁၈ ဒီဇင်ဘာလ ၂၀ ရက်နေ့ကတွေ့ရစဉ်။
Photo: Min Thein Aung/RFA
ရခိုင်ပြည်နယ် ကျောက်တော်မြို့နယ်အတွင်းမှာ တပ်မတော်နဲ့ AA ရခိုင်အဖွဲ့တို့ရဲ့တိုက်ပွဲတွေကြောင့် ကန်စောက်၊ သလူချောင်း၊ ငါးစင်ရိုင်းကိုင်း စတဲ့ ကျေးရွာတွေကို ထွက်ပြေးရောက်ရှိနေကြတဲ့ စစ်ဘေးဒုက္ခသည်တွေဟာ ဒီနေ့ညနေပိုင်းမှာ လူဦးရေ ၄၀၀ ကျော်အထိရှိနေတယ်လို့ ဒေသခံတွေက ပြောပါတယ်။

တပ်မတော်ဘက်က ရဟတ်ယာဉ်တွေသုံးပြီး လက်နက်ကြီးတွေနဲ့ တိုက်ခိုက်မှုကြောင့် ပြီးခဲ့တဲ့ ဒီဇင်ဘာလ ၁၈ ရက်နေ့ကစပြီး တဖြည်းဖြည်း ထွက်ပြေးတိမ်းရှောင်လာကြတာလို့လည်း စစ်ဘေး ဒုက္ခသည်တွေက ပြောပါတယ်။

ဒီနေ့မှာလည်း ကျောက်တော်မြို့နယ် ယိုးချောင်းအထက်ပိုင်း တွင်းပညာကျေးရွာအနီးတဝိုက်မှာ ပစ်ခတ်မှုတွေ ရှိနေဆဲဖြစ်တယ်လို့ ကျောက်တော်မြို့နယ်က ပြည်နယ်လွှတ်တော်ကိုယ်စားလှယ် ဦးမောင်သန်းစိန် က RFA ကို ပြောပါတယ်။

ကျောက်တော်မြို့နယ် ကန်စောက်ကျေးရွာမှာတော့ ကျွန်းသာယာ၊ ချင်းမဝန်တောင်း၊ ခရုမော်၊ စတဲ့ ကျေးရွာတွေက စစ်ဘေး ဒုက္ခသည် ၁၀၀ လောက်ရောက်ရှိနေပြီး အများစုက အမျိုးသမီးတွေ၊ ကလေးငယ်တွေနဲ့ သက်ကြီး ရွယ်အိုတွေဖြစ်ကြပါတယ်။

အဲဒီစစ်ဘေးဒေုက္ခသည်တွေအတွက် ရခိုင်အမျိုးသားပါတီ ANP က ဆန်အိတ်တွေ ဒီနေ့သွားရောက်လှူဒါန်းခဲ့ပြီး အရေးပေါ်အကူအညီတွေပေးအပ်ဖို့ မြို့နယ်အုပ်ချုပ်ရေးမှူးထံ တင်ပြထားတယ်လို့ ကန်စောက်ကျေးရွာ အုပ်ချုပ်ရေးမှူး ဦးသင်္ခါကျော်က ပြောပါတယ်။

ဒီသတင်းကို RFA သတင်းထောက် ကိုမင်းသိန်းအောင် ပေးပို့လိုက်တာပါ။
ဆက်နွယ်သောသတင်းများ
သတင်းများ
မှတ်ချက်ပေးပို့ရန်

မှတ်ချက်များကို အောက်ပါ ပုံစံတွင် ရေးသားနိုင်ပါသည်။ RFA ၏ အသုံးပြုခြင်းဆိုင်ရာ စည်းမျဉ်းစည်းကမ်းများနှင့် အညီ လိုအပ်လျှင် တည်းဖြတ်ပြီး ဖော်ပြပါမည်။ မှတ်ချက်များကို ရေးပြီးပြီးချင်း ချက်ခြင်း မြင်ရမှာ မဟုတ်ပါ။ တင်ပြထားသော မှတ်ချက်ပါ အကြောင်းအရာများ အတွက် RFA မှာ တာဝန်မရှိပါ။ ကျေးဇူးပြု၍ တခြား မှတ်ချက်ရေးသူများ၏ အမြင်ကို လေးစားပြီး အကြောင်းအရာကိုသာ အဓိကထား ရေးသားစေလိုပါသည်။