ကယားမှာ လဝက်အတွင်း အရပ်သား ၈၀ နီးပါး သေဆုံး

၁၁၁၁ စစ်ဆင်ရေးစတဲ့ လဝက်ကျော်အတွင်း ကယားပြည်နယ် လွိုင်ကော်မြို့နယ်နဲ့ ရှမ်းပြည်နယ်တောင်ပိုင်း မိုးဗြဲမြို့နယ်မှာ အရပ်သား ၈၀ နီးပါး သေဆုံးခဲ့တယ်လို့ ကရင်နီလူသားချင်း စာနာထောက်ထားမှုဆိုင်ရာ အကူအညီပေးရေးအဖွဲ့ (KHAI) က နိုဝင်ဘာလ ၂၈ ရက်နေ့က ထုတ်ပြန်ပါတယ်။

စစ်ဆင်ရေးစတဲ့ နိုဝင်ဘာလ ၁၁ ရက်နေ့ကနေ နိုဝင်ဘာလ ၂၇ ရက်နေ့အတွင်း လက်နက်ကြီးကြောင့် ၃၇ ဦး၊ လေကြောင်းတိုက်ခိုက်မှုကြောင့် ၂၄ ဦး၊ ပစ်ခတ်ခံရတာကြောင့် ၁၅ ဦး၊ စုစုပေါင်း ၇၆ ဦး သေဆုံးခဲ့ရတာလို့ KHAI က ဆိုပါတယ်။

သေဆုံးသူတွေရဲ့ တစ်ဝက်နီးပါးဟာ အမျိုးသားတွေဖြစ်ပြီး အမျိုးသမီး၊ အသက်မပြည့်သေးသူနဲ့ ဘာသာရေးဆိုင်ရာ ပုဂ္ဂိုလ်တွေ ပါဝင်နေတာကိုလည်း KHAI ရဲ့ စာရင်းမှာ တွေ့ရပါတယ်။

အရပ်သား ထိခိုက်သေဆုံးမှုတွေဟာ နိုဝင်ဘာလ ၂၂ ရက်နေ့မှာ အများဆုံးဖြစ်နေတယ်လို့လည်း KHAI က ဖော်ပြထားပါတယ်။

ဒါနဲ့ပတ်သက်လို့ စစ်ကောင်စီရဲ့ ကယားပြည်နယ် ပြောခွင့်ရ လူမှုရေးရာဝန်ကြီး ဦးမြင့်ကြည်ကို RFA က တယ်လီဖုန်းနဲ့ ဆက်သွယ်ခဲ့ပေမယ့် လက်ခံဖြေဆိုတာ မရှိပါဘူး။