ဘင်္ဂလားဒေ့ရှ်နိုင်ငံသား ၁၆ ဦးကို ကယ်တင်လွှဲပြောင်းခဲ့ကြောင်း AA ပြော

ဘင်္ဂလားပင်လယ်အော်အတွင်း ပင်လယ်ဓားပြ အတိုက်ခံရပြီး စွန့်ပစ်ခံရတဲ့ ဘင်္ဂလားဒေ့ရှ်နိုင်ငံသား ၁၆ ဦးကို အာရက္ခတပ်တော် (AA) က ကယ်တင်ပြီး ဘင်္ဂလားဒေ့ရှ်နိုင်ငံထံ ပြန်လည်လွှဲပြောင်းပေးလိုက်တယ်လို့ အောက်တိုဘာလ ၁၄ ရက်နေ့မှာ ထုတ်ပြန်ပါတယ်။

ရေလုပ်သားတွေဟာ ဘင်္ဂလားဒေ့ရှ်နိုင်ငံ၊ ကော့ဘဇားခရိုင်ထဲမှာ နေထိုင်ကြသူတွေဖြစ်ပြီး စက်တင်ဘာလ ၂၈ ရက်နေ့က ဘင်္ဂလားပင်လယ်အော်အတွင်း ငါးဖမ်းဖို့ ထွက်လာခဲ့ကြတာပါ။ ပင်လယ်ပြင်ထဲမှာ ငါးဖမ်းနေချိန် အောက်တိုဘာလ ၄ ရက်နေ့မှာတော့ အင်အား ခြောက်ဆယ်ခန့်ပါ ပင်လယ်ဓားပြအဖွဲ့က ဓားပြတိုက်ခဲ့တာလို့ ဆိုပါတယ်။

ပင်လယ်ဓားပြအဖွဲ့က ဘင်္ဂလားဒေ့ရှ်နိုင်ငံသား ၁၆ ဦးကို သေနတ်ဒင်၊ တုတ်တွေနဲ့ ရိုက်နှက်ပြီး စက်လှေမှာ ပါလာတဲ့ ငွေကြေး၊ ဖုန်းနဲ့ စားနပ်ရိက္ခာ၊ လောင်စာဆီတွေကို ယူဆောင်သွားခဲ့တယ်လို့ AA ထုတ်ပြန်ချက်မှာ ဖော်ပြပါတယ်။

အောက်တိုဘာလ ၇ ရက်နေ့မှာတော့ မောင်တောမြို့ ကျောက်ပန္ဒူကမ်းခြေအနီးမှာ စက်လှေကိုတွေ့ခဲ့ရပြီး ရေလုပ်သား ၁၆ ဦးလုံး ကယ်တင်နိုင်ခဲ့တယ်လို့ ဆိုပါတယ်။

အာရက္ခတပ်တော် (AA) က ထိခိုက်ဒဏ်ရာရသူတွေကို ဆေးကုသမှုပေးခဲ့သလို ဘင်္ဂလားဒေ့ရှ် နယ်ခြားစောင့်တပ်ဖွဲ့နဲ့ ဆက်သွယ်ပြီး အောက်တိုဘာလ ၁၄ ရက်နေ့မှာ ပြန်လွှဲပြောင်းပေးခဲ့တာလို့ ဆိုပါတယ်။

ပြီးခဲ့တဲ့ အောက်တိုဘာလ ၉ ရက်နေ့ကလည်း AA ထိန်းချုပ်ရာ မြန်မာရေပိုင်နက်ဖြစ်တဲ့ နတ်မြစ်အတွင်း ရောက်လာတဲ့ ဘင်္ဂလားဒေ့ရှ် ရေလုပ်သားငါးဦးကို AA က ဘင်္ဂလားဒေ့ရှ် နယ်ခြားစောင့်တပ်ဖွဲ့ထံ ပြန်လွှဲပြောင်းပေးခဲ့ပါတယ်။