ဧရာဝတီ ရေဘေး ကျောင်းသားသမဂ္ဂဝင်များ ရန်ပုံငွေရှာ
2012.08.26
ရန်ကုန်မြို့ရဲ့ အဓိကဈေးကြီးတွေဖြစ်တဲ့ မင်္ဂလာဈေး၊ ယုဇနပလာဇာ နဲ့ လှိုင်သာယာမြို့နယ်တို့မှာ ရန်ကုန်မြို့က တက္ကသိုလ် အသီးသီးမှာ ဖွဲ့စည်းထားတဲ့ ဗမာနိုင်ငံလုံးဆိုင်ရာ ကျောင်းသားသမဂ္ဂက ကျောင်းသားတွေ ပါဝင်ပြီးု အလှူခံထွက်ခဲ့တာလို့ ဗကသအဖွဲ့ရဲ့ အထွေထွေ အတွင်းရေးမှူး ကိုအောင်အောင်ကျော်က RFA ကို ပြောပါတယ်။
အဲဒီလှုပ်ရှားမှုကို ဒီကနေ့နဲ့ မနက်ဖြန် နှစ်ရက်ဆက်တိုက် လုပ်ဆောင်သွားမှာ ဖြစ်ပြီး ရန်ကုန်မြို့ရဲ့ အချက်အချာကျတဲ့ နေရာတွေမှာ ကျောင်းသားတွေက တတ်ကျွမ်းတဲ့ ဂီတအနုပညာနဲ့ ပရိသတ်ကို ဖျော်ဖြေပြီး အလှူခံတာ ဖြစ်ပါတယ်။ အလှူခံလို့ ရရှိတဲ့ ဆေးဝါး၊ ငွေကြေး အပါအဝင် တခြား အသုံးအဆောင် ပစ္စည်းတွေကို စုစည်းပြီး လာမည့် သြဂုတ်လ (၃၁) ရက်နေ့မှာ ဧရာဝတီတိုင်းရဲ့ ရေဘေးသင့်နေရာ အသီးသီးကို သွားရောက်လှူဒါန်းမယ်လို့ သိရပါတယ်။
ဒီကနေ့မှာတော့ အလှူငွေ ကျပ် (၃) သိန်းနီးပါး၊ ဆေးဝါးနဲ့ အဝတ်အထည်တွေ လက်ခံရရှိခဲ့တယ်လို့လည်း ကျောင်းသား ခေါင်းဆောင်တွေက ပြောပါတယ်။