རྒྱ་ནག་གི་སྲིད་བློན་འདས་པོ་ཀྲའོ་ཙི་དབྱང་གི་འདས་མཆོད་ཉིན་དུར་སའི་ཉེ་འཁོར་དུ་དམ་དྲག

• 2021-04-05

རྒྱ་ནག་གི་སྲིད་བློན་འདས་པོ་ཀྲའོ་ཙི་དབྱང་གི་འདས་མཆོད་སྐབས་སུ་རྒྱ་ནག་གཞུང་གིས་དུར་སའི་ཉེ་འཁོར་དུ་དམ་དྲག་བྱས་ཡོད་འདུག
སྤྱི་ཟླ་བཞི་བའི་ཚེས༤ཉིན། རྒྱ་ནག་གི་སྲིད་བློན་འདས་པོ་ཀྲའོ་ཙི་དབྱང་(Zhao Ziyang)གི་འདས་མཆོད་ཉིན། ཀྲའོ་ཙི་དབྱང་གི་བུ་དང་བུ་མོ་གཉིས་གཙོས་ནང་མི་ཉེ་འབྲེལ་མི་གྲངས་ཉི་ཤུ་དུར་སར་འཛོམས་ནས་མེ་ཏོག་ཕུལ་བ་དང་། དུས་ཡུན་སྐར་མ་༢༠ཙམ་གྱི་རིང་འདས་མཆོད་བྱས་ཡོད་ནའང་། སྐབས་དེར་རྒྱ་ནག་གི་ཉེན་རྟོག་པས་དུར་སའི་ཉེ་འཁོར་དུ་མི་གཞན་འགྲོ་བསྐྱོད་བྱེད་དུ་མ་བཅུག་པར་དམ་དྲག་ནན་མོ་བྱས་ཡོད་པ་འབྲེལ་ཡོད་མི་སྣས་འདི་གའི་རླུང་འཕྲིན་ཁང་གི་རྒྱ་སྐད་སྡེ་ཚན་ལ་འགྲེལ་བརྗོད་གནང་ཡོད་པ་རེད།
རྒྱ་ནག་གི་སྲིད་བློན་འདས་པོ་ཀྲའོ་ཙི་དབྱང་ནི། སྤྱི་ལོ་༡༩༨༩ལོའི་པེ་ཅིང་གནམ་སྡེ་སྒོ་མོ་ཆེའི་སློབ་མའི་དམངས་གཙོའི་ལས་འགུལ་དྲུག་བཞིའི་དོན་རྐྱེན་སྐབས་སུ། ཁོང་གིས་སློབ་མ་ཚོའི་ལས་འགུལ་ལ་རྒྱབ་སྐྱོར་བྱས་པའི་ནག་ཉེས་བཙུགས་ནས་མི་ལོ་༡༦གི་རིང་ལ་ཁྱིམ་དུ་བཟང་བཙོན་དུ་བཅུག་ནས་རྗེས་སུ་འདས་གྲོངས་སུ་ཕྱིན་པ་ཞིག་ཡིན་པ་རེད།