གྲོས་ཚོཊ་ཚོཊ་དུས་དྲུག་པ་མཇུག་སྒྲིལ།
བོད་མི་དམངས་སྤྱི་འཐུས་སྐབས་བཅོ་ལྔ་པའི་གྲོས་ཚོགས་ཚོགས་དུས་དྲུག་པ་དེ་རིང་གཟའ་སྤེན་པའི་ཉིན་མཇུག་བསྒྲིལ་གནང་ཡོད་པ།
-
2013-09-28 -
-
-
Your browser doesn’t support HTML5 audio
༄༅༎འདས་པའི་ཉིན་གྲངས་བཅུའི་རིང་ཚོགས་པའི་བོད་མི་དམངས་སྤྱི་འཐུས་གྲོས་ཚོགས་སྐབས་བཅོ་ལྔ་པའི་ཚོགས་དུས་དྲུག་པའི་ཚོགས་འདུ། དེ་རིང་གཟའ་སྤེན་པའི་ཉིན་མཇུག་བསྒྲིལ་ཞིང་། བོད་མི་དམངས་སྤྱི་འཐུས་ཚོགས་གཙོ་སྤེན་པ་ཚེ་རིང་ལགས་ཀྱིས་བོད་དོན་རྒྱབ་སྐྱོར་དང་བོད་རྒྱ་འབྲེལ་མོལ་གྱི་ལས་དོན་ཁག་སྔར་ལྷག་ཚགས་ཚུད་གཏོང་དགོས་པ་དང་། གོ་སྐབས་མ་བརླག་པ་བྱེད་དགོས་པ་ནན་བརྗོད་གནང་པ་དང་། ད་དུང་ཁོང་གིས་ཐེངས་འདིའི་གྲོས་ཚོགས་སྐབས་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་ཕམ་དྭངས་སེལ་གྱི་གཞུང་འབྲེལ་གྲོས་ཆོད་ཅིག་ཀྱང་འཇོག་དགོས་བྱུང་བ་ནི་བློ་ཕམ་གྱི་རང་བཞིན་ཞིག་ཡིན་ཡང་། གྲོས་ཆོད་ཀྱི་ནང་བཀའ་བློན་དང་སྤྱི་འཐུས་རྣམ་པ་ཚང་མས་ད་ནས་བཟུང་༧གོང་ས་༧སྐྱབས་མགོན་ཆེན་པོ་མཆོག་ལ་མཚན་སྨད་ཞུ་མཁན་ལ་སོགས་པ་དེ་དག་གི་ཐོག་འཛེམས་མེད་ཐོག་ནས་གདོང་ལེན་བྱ་རྒྱུ་འཁོད་དོན་ལྟར་ངེས་པར་ལག་བསྟར་དགོས་པའི་དྲན་བསྐུལ་ཡང་གནང་འདུག།
ཡང་སྲིད་སྐྱོང་བློ་བཟང་སངྒེ་ལགས་ཀྱིས་བོད་རྒྱའི་དཀའ་རྙོག་སེལ་བའི་དབུ་མའི་ལམ་གྱི་སྲིད་བྱུས་ལ་ཡོངས་སུ་རྒྱབ་སྐྱོར་ཞུ་རྒྱུ་མ་ཟད། བཀའ་ཤག་གི་འཆར་གཞིའི་ནང་བཀའ་བློན་རྣམ་པ་བོད་མི་གནས་ཡུལ་སྤྱི་དང་ལྷག་པར་བོད་པའི་གཞིས་ཆགས་ཁག་གི་ནང་ཕྱོགས་ཕེབས་ཀྱིས་དམིགས་བསལ་དབུ་མའི་ལམ་གྱི་གོ་རྟོག་སྤེལ་རྒྱུ་ཡིན་པ་གསུངས་པ་དང་། ད་དུང་སྲིད་སྐྱོང་བློ་བཟང་སེངྒེ་ལགས་ཀྱིས་སྐབས་བཅུ་བཞི་པའི་ད་ལྟའི་བཀའ་ཤག་གི་དུས་ཡུན་དེའི་རིང་བོད་དོན་དྲིལ་བསྒྲགས་དེ་སྔོན་ལས་རྒྱ་ཆེ་བ་བྱུང་ཡོད་པར་མ་ཟད་། འཛམ་གླིང་ཡུལ་གྲུ་ཁག་གི་ནང་བོད་དོན་གྲོས་ཆོད་བཞག་པ་དེ་དག་ནི་དེ་སྔོན་ལས་ཧ་ཅང་མང་བ་བྱུང་ཡོད་པ་འགྲེལ་བརྗོད་གནང་འདུག།
བོད་མི་མང་སྤྱི་འཐུས་སྐབས་བཅོ་ལྔ་པའི་གྲོས་ཚོགས་ཚོགས་དུས་དྲུག་པའི་ཉིན་མཐའ་མའི་སྐོར་འདི་གའི་གསར་འགོད་པ་དོན་གྲུབ་རྡོ་རྗེ་ལགས་ཀྱིས་བཏང་བར་གསན་རོགས།