རྒྱ་ནག་གི་དཔོན་རིགས་གསར་པར་འབོད་བསྐུལ།

• 
  2012-11-16

༄༅།    །ཁ་སང་ཕྱི་ཚེས་༡༥ཉིན་རྒྱ་ནག་གི་དཔོན་རིགས་དངོས་སུ་འཕོ་འགྱུར་ཕྱིན་ནས་རྒྱ་ནག་གི་ཆེས་མཐོའི་དཔོན་རིགས་སམ།  རྒྱ་ནག་ཆབ་སྲིད་ལྷན་ཁང་གིས་གསར་དུ་བསྐོ་བཞག་བྱས་པའི་རྒྱུན་ལས་མི་བདུན་གྱིས་རྒྱ་ནག་གི་དབང་ཆ་དངོས་སུ་རྩིས་ལེན་བྱས་ཡོད་པའི་དུས་ཚིགས་དང་བསྟུན། བཞུགས་སྒར་རྡ་རམ་ས་ལར་ཡོད་པའི་བོད་མི་དང་ཕྱི་རྒྱལ་བ་སོགས་ཀྱིས་ཁྲོམ་གཞུང་དུ་ཐོན་ནས་  རྒྱ་ནག་གཞུང་གིས་བོད་ནང་འཛིན་བཞིན་པའི་གདུག་རྩུབ་ཅན་གྱི་དྲག་གནོན་སྲིད་ཇུས་ལ་ངོ་རྒོལ་སྐད་འབོད་གནང་བ་དང་འབྲེལ།  རྒྱ་ནག་གི་འགོ་ཁྲིད་གསར་པ་ཚོས་དེང་སྐབས་བོད་ནང་བྱུང་བཞིན་པའི་རང་ལུས་མེར་སྲེག་གི་གནས་སྟངས་མཚམས་འཇོག་ཡོང་ཐབས་ཆེད། ཁོང་རྣམས་ཀྱི་དགོས་འདུན་ལ་བསམ་ཞིབ་གནང་དགོས་པའི་ཛ་དྲག་གི་འབོད་སྐུལ་གནང་ཡོད་འདུག  
རྒྱ་ནག་དཔོན་རིགས་གསར་པར་འབོད་བསྐུལ་གྱི་ལས་འགུལ་དེ་བོད་པའི་གཞུང་འབྲེལ་མ་ཡིན་པའི་ཚོགས་པ་བཞིའི་གོ་སྒྲིག་འོག་སྤེལ་བ་ཞིག་ཡིན་པ་དང་།     ལས་འགུལ་ནང་བཞུགས་མཁན་བློ་བཟང་དབང་རྒྱལ་ལགས་ཀྱིས།  བོད་ནང་གི་བོད་མི་ཚོས་རང་ཉིད་ཀྱི་བསམ་ཚུལ་བཏོན་ཐབས་ཆེད་ཁྲོམ་གཞུང་དུ་ཐོན་ནས་ཞི་རྒོལ་བྱས་ཏེ། རྒྱ་ནག་གི་དཔོན་རིགས་ཚོས་བོད་ཀྱི་དཀའ་གནད་སེལ་རྒྱུའི་ཐབས་ལམ་བཏོན་ཐབས་བྱས་ཡོད་ཀྱང་།  དཀའ་གནད་སེལ་མ་ཐུབ་པར་ད་དུང་གནས་སྟངས་ཛ་དྲག་ཏུ་དང་།    ཚབས་ཆེ་རུ་འགྲོ་བཞིན་ཡོད་སྟབས།  ད་ཆ་བོད་མི་ཚོ་ཐབས་ཟད་འུ་ཐུག་གིས་རང་ལུས་མེར་བསྲེགས་བཏང་ནས་ད་བར་བོད་མི་༧༢ཙམ་གྱིས་རང་ལུས་མེར་བསྲེགས་བཏང་གནང་ཏེ།    བོད་ནང་གི་གནས་སྟངས་དེར་འགྱུར་ལྡོག་ཡོང་རྒྱུའི་རེ་བ་བྱེད་བཞིན་ཡོད་པར་བརྟེན།  རྒྱ་ནག་གི་དཔོན་རིགས་གསར་པ་ཚོས། བོད་ནང་གི་ད་ལྟའི་ཛ་དྲག་གི་གནས་སྟངས་དེ་སེལ་ཐབས་ལ་རྒྱ་ནག་གཞུང་གིས་བོད་ནང་འཛིན་བཞིན་པའི་སྲིད་ཇུས་ལ་བསྐྱར་ཞིབ་གནང་དགོས་པའི་འབོད་སྐུལ་ཞུ་བཞིན་ཡོད་ཅེས་གསུང་འདུག །