བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེ་ཟུར་པ་ཝུའུ་གཡིང་ཇེ་ཡིས་ཏང་ལ་དད་སེམས་དང་ཕུགས་བསམ་ཉམས་པས་ཏང་གི་སྐྱིད་སྡུག་ནས་ཕུད་ཡོད་སྐོར་བསྒྲགས་འདུག
བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེ་ཟུར་པ་ཝུའུ་གཡིང་ཇེ་ཡིས་ཏང་ལ་དད་སེམས་དང་ཕུགས་བསམ་ཉམས་པས་ཏང་གི་སྐྱིད་སྡུག་ནས་ཕུད་ཡོད་སྐོར་བསྒྲགས་འདུག
- 2024-12-11
-
-
-
Your browser doesn’t support HTML5 audio
ཕྱི་ལོ་ ༢༠༢༤ ཟླ་ ༡༢ ཚེས་ ༡༡ཉིན། རྒྱ་ནག་གཞུང་གིས་བཅད་བགོས་བྱས་པའི་བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེ་ཟུར་བ་ཝུའུ་གཡིང་ཇེ་(Wu Yingjie)ཟེར་བར། འདི་ལོའི་ཕྱི་ཟླ་ ༦་པ་ནས་བཟུང་ཞིབ་བཤེར་བྱེད་བཞིན་པ་ལྟར། ཐེངས་འདིར་ཁོས་ཏང་ལ་དད་སེམས་ཉམས་པ་དང་ཏང་གཤིས་ཀྱི་རྩ་དོན་ཤོར་བ། ཕུགས་བསམ་ཉམས་པ་དང་བོད་རང་སྐྱོང་ལྗོངས་ཀྱི་ཏང་གི་ཆབ་སྲིད་ཁོར་ཡུག་ལ་གཏོར་སྐྱོན་བཟོས་པ་སོགས་ཀྱི་ཉེས་མིང་བཀའ་ཏེ། ཝུའུ་གཡིང་ཇེ་ཏང་གི་སྐྱིད་སྡུག་དང་ལས་གནས་ནས་ཕྱིར་ཕུད་ཀྱི་ཉེས་ཆད་བཅད་ཡོད་པའི་གནས་ཚུལ་ཐོན་ཡོད་པ་དང་། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ནས། འདས་པའི་ཟླ་ཤས་ནང་བོད་རང་སྐྱོང་ལྗོངས་ནང་མཐོ་རིམ་མགོ་ཁྲིད་ལ་ཞིབ་བཤེར་དང་གོ་གནས་འཕོ་འགྱུར་སོགས་ཀྱི་གནས་ཚུལ་མང་དག་ཅིག་ཕྱིན་སོང་བ་དང་། ལྷག་པར་དུ་ཐེངས་འདིར་ཝུའུ་གཡིང་ཇེ་ཡིས་ཏང་ལ་དད་སེམས་ཉམ་པ་སོགས་ཀྱི་ཉེས་ཆད་རིགས་ཚང་མ། ཞི་ཅིན་ཕིན་གྱི་དམར་ཤོག་ཚོགས་པ་ནང་ཁུལ་གྱི་དབང་ཆ་འཐབ་རྩོད་ཀྱི་གཙང་བཟོའི་ཆ་ཤས་ཤིག་ཆགས་ཀྱི་ཡོད་པ་འགྲེལ་བརྗོད་གནང་བྱུང་།
ཐེངས་འདིར་རྒྱ་ནག་གཞུང་འབྲེལ་གསར་ལམ་ཁག་གིས་བསྒྲགས་པའི་གནས་ཚུལ་ནང་། ཝུའུ་གཡིང་ཇེ་ལ་རྒྱ་ནག་སྒྲིག་ཁྲིམས་ཞིབ་བཤེར་ལས་ཁུངས་ནས་ཞིབ་བཤེར་བརྟག་དཔྱད་བྱས་པ་བརྒྱུད། ཁོས་བོད་ལྗོངས་ཀྱི་སྤུས་ཚད་མཐོ་བའི་འཕེལ་རྒྱས་ལ་ཤུགས་རྐྱེན་ཚབས་ཆེན་བཟོས་པ་དང་། ཕྱོགས་ཡོངས་ནས་ཏང་ནན་གྱིས་སྐྱོང་བའི་བྱེད་པོའི་འགན་འཁྲི་སྒྲུབ་ནུས་མི་འདང་བ། ལྐོག་ཟ་རུལ་སུངས་ཀྱི་གནད་དོན་མཆེད་པར་མཐུན་རྐྱེན་སྐྲུན་པ། ཆབ་སྲིད་ཀྱི་ཁོར་ཡུག་ལ་གཏོར་བཤིག་གཏོང་བ། རྩ་འཛུགས་ཀྱི་གཏམ་གླེང་དང་ཡིག་སྐུར་འདྲི་རྩད་བྱེད་སྐབས་གནད་དོན་ཇི་མ་ཇི་བཞིན་གསལ་བཤད་མི་བྱེད་པ། སྤྱོད་གཙང་གི་མཐའ་ཚད་ཤོར་བ་དང་། ལག་རྟགས་དང་འབུལ་རྟེན་བླངས་པ། ལས་གནས་ཀྱི་དབང་ཆ་སྤྱད་དེ་གཉེན་ཉེར་དམིགས་བསལ་གྱི་ཁེ་ཕན་དོན་གཉེར་བྱས་ཡོད་པ་སོགས་ཀྱི་ནག་ཉེས་བསྒྲངས་འདུག
རྒྱ་ནག་གཞུང་གིས་ཝུའུ་གཡིང་ཇེ་ལ་འདི་ལོའི་ཕྱི་ཟླ་ ༦ ཚེས་ ༡༦ ནས་བཟུང་སྒྲིག་འགལ་ཁྲིམས་འགལ་དང་ལྐོག་ཟ་རུལ་སུངས་ཀྱི་ཉེས་མིང་འོག རྒྱ་ནག་དམར་ཤོག་ཚོགས་པའི་སྒྲིག་ཁྲིམས་ཞིབ་བཤེར་ལས་ཁུངས་ཟེར་བས་ཞིབ་བཤེར་བྱེད་བཞིན་པའི་གནས་ཚུལ་ཐོན་ཡོད་པ་རེད་ལ། ཁོས་ལྐོག་ཟ་རུལ་སུངས་དང་སྒྲིག་འགལ་ཁྲིམས་འགལ་ཚབས་ཆེན་བྱས་ཡོད་སྐོར་ཙམ་ལས་ཞིབ་ཕྲའི་གནས་ཚུལ་མེད་ན་ཡང་། གནས་ཚུལ་དེ་སྤྱི་ཚོགས་དྲ་ལམ་ཁག་ཏུ་ཁྱབ་རྗེས། བོད་མི་ཚོས་ཝུའུ་གཡིང་ཇེ་ལ་བརྟག་དཔྱད་བྱེད་བཞིན་པ་དེ་ཡག་པོ་ཡིན་པ་དང་། དམར་ཤོག་ཚོགས་པའི་འགོ་ཁྲིད་རྫུན་མ་ཚོར་ཞིབ་བཤེར་དེ་རིགས་མུ་མཐུད་བྱེད་དགོས་པའི་དགའ་བསུ་ཤུགས་ཆེར་བྱས་ཡོད་པ་རེད་ལ། ཝུའུ་གཡིང་ཇེ་ནི་དམར་ཤོག་ཚོགས་ཆེན་ ༢༠ རྗེས་སུ་ཞིབ་བཤེར་བྱས་པའི་བོད་རང་སྐྱོང་ལྗོངས་ཟེར་བའི་མཐོ་རིམ་མགོ་འཁྲིད་ ༥ པ་དེ་ཆགས་ཡོད་པ་རེད་ལ། འདི་ལོའི་ཕྱི་ཟླ་ ༡ ཚེས་ ༢༩ ཉིན་བོད་རང་སྐྱོང་ལྗོངས་སྲིད་གཞུང་གི་མགོ་འཁྲིད་གཞོན་པ་ཝང་ཡོང་དང་། ཕྱི་ཟླ་ ༣ པའི་ནང་བོད་རང་སྐྱོང་ལྗོངས་དམངས་ཆེན་གྱི་རྒྱུན་ལས་མགོ་འཁྲིད་གཞོན་པ་ཇི་གོ་ཀང་། འདི་ལོའི་ཕྱི་ཟླ་ ༡ ནང་བོད་རང་སྐྱོང་སྲིད་གཞུང་དམར་ཚོགས་ཀྱི་མགོ་འཁྲིད་གཞོན་པ་ཀྲང་ཧོང་ཙི། ཕྱི་ཟླ་ ༦ ཚེས་ ༡༤ ཉིན་བོད་རང་སྐྱོང་ལྗོངས་རྒྱུན་ལས་ལྷན་ཁང་གི་མགོ་འཁྲིད་གཞོན་པ་ཅང་ཅེ་བཅས་སྔ་རྗེས་སུ་གནས་དབྱུང་བཏང་སྟེ་ཞིབ་བཤེར་བྱས་ཡོད་པ་རེད།
ཝུའུ་གཡིང་ཇེ་ཕྱི་ལོ་ ༢༠༡༦ ནས་ཕྱི་ལོ་ ༢༠༢༡ བར་བོད་རང་སྐྱོང་ལྗོངས་ཟེར་བའི་དམར་ཤོག་ཚོགས་པའི་དྲུང་ཆེའི་གོ་གནས་བཟུང་སྟེ། དུས་ཡུན་དེའི་རིང་དམིགས་བསལ་༸གོང་ས་རྒྱལ་བ་རིན་པོ་ཆེ་མཆོག་དང་། བཙན་བྱོལ་བོད་མི་ཚོར་ཁ་བྲལ་འཐབ་རྩོད་དགོས་པའི་ལས་འགུལ་ཤུགས་ཆེར་སྤེལ་ཡོད་པ་མ་ཟད། ཁོས་ཁ་བྲལ་སློབ་གསོ་དེ་སློབ་གྲྭ་དང་དགོན་སྡེ་ཁག་ཏུ་ཁྱབ་དགོས་པའི་ལས་འགུལ་འོག་བོད་རང་སྐྱོང་ལྗོངས་ཀྱི་སློབ་གྲྭ་ཁག་ཏུ་རྒྱ་ཡིག་སློབ་ཁྲིད་གཙོ་བོར་འཛིན་པའི་ཐོག་ནས་རྒྱ་སྒྱུར་སློབ་གསོ་ཤུགས་ཆེར་སྤེལ་བ་དང་། བོད་ནང་སྔར་ལས་དྲག་གནོན་དང་དམ་དྲག་སྟངས་འཛིན་ཤུགས་ཆེ་བྱས་ཏེ་བོད་ནང་གི་འགྲོ་བ་མིའི་ཐོབ་ཐང་གནས་སྟངས་ཐད་རྡོག་རོལ་ཤུགས་ཆེ་བཏང་སྟབས། ཕྱི་ལོ་ ༢༠༢༢ ལོར་ཨ་རི་གཞུང་གིས་བོད་ནང་གི་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེ་བཏང་བའི་ནག་ཉེས་འོག་ཝུའུ་གཡིང་ཇེ་དང་།ལྷ་སའི་ཉེན་རྟོག་སྤྱི་ཁྱབ་ཟུར་པ་ཀྲང་ཧོང་པའོ་ (Zhang Hongbo) ཟེར་བ་གཉིས་ལ། ཨ་རིར་ཡོད་པའི་རྒྱུ་དངོས་ཡོངས་རྫོགས་བཀག་སྡོམ་བྱས་ཏེ་ཉེས་ཆད་བཏང་ཡོད་པ་རེད།
གསར་འགོད་པ། བདེ་ཆེན་དབང་མོ།
རྩོམ་སྒྲིག་པ། བདེ་སྐྱིད་ཀུན་སྒྲོལ།
དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།