ཐའེ་ལྦན་གཞུང་འཛིན་ཚོགས་པར་འོས་བསྡུ་ཕམ་ཉེས་བྱུང་བ།

• 
  2010-02-27

༄༅༎སྲིད་འཛིན་མ་ཡིང་ཇུ་ཡིས་མང་ཚོགས་ཀྱི་རྒྱབ་སྐྱོར་གང་མང་ཐོབ་ཐབས་ཀྱི་འབད་བརྩོན་ཆེན་པོ་གནང་བཞིན་ཡོད་ནའང༌། དེ་རིང་ཐའེ་ལྦན་ནང་ཁ་སྐོང་འོས་བསྡུ་ཁག་བཞི་བྱས་པའི་ནང་ནས་གསུམ་ཤོར་ནས་ཐའེ་ལྦན་གྱི་གཞུང་འཛིན་གོ་མིང་ཏང་ཚོགས་པར་འོས་བསྡུའི་ཕམ་ཉེས་ཐེངས་གསུམ་པ་དེ་བྱུང་འདུག།

ཐའེ་ལྦན་གྱི་སིན་ཁྲུ་ ཐའོ་ཡོན་ ཅ་ཡི་རྫོང་ཁག་གསུམ་ནང་རྒྱལ་ཡོངས་འཐུས་མིའི་འོས་ཤོག་དེ་ཕྱོགས་འགལ་དམངས་གཙོ་ཡར་ཐོན་ཚོགས་པའི་འོས་མི་ལ་རྒྱལ་ཁ་ཐོབ་ཡོད་སྐོར་ཐའེ་ལྦན་དབུས་འོས་བསྡུ་ལྷན་ཁང་གིས་གསལ་བསྒྲགས་གནང་བཞག།

རྫོང་ཁག་བཞིའི་ནང་ཁ་སྐོང་འོས་བསྡུ་བྱས་པའི་སྐབས་རྫོང་སྡེ་གསུམ་ནང་གོ་མིང་ཏང་ཚོགས་པར་ཕམ་ཉེས་བྱུང་ཡོད་ནའང༌། ཁྱོན་འཐུས་མི་༡༡༣ཡོད་པའི་ཐའེ་ལྦན་རྒྱལ་ཡོངས་གྲོས་ཚོགས་ནང་གོ་མིང་ཏང་ཚོགས་པར་ད་ལྟའི་སྐབས་སུ་འཐུས་མི་༧༤ཡོད་པའི་ཐོག་ནས་གྲངས་མང་ཆགས་ཀྱི་ཡོད་ཅིང༌། གྲོས་ཚོགས་ནང་དམངས་གཙོ་ཡར་ཐོན་ཚོགས་པའི་འཐུས་མི་༣༣ལས་མེད་པ་རེད།

ཐའེ་ལྦན་གོ་མིང་ཏང་ཚོགས་པའི་གྲོས་ཚོགས་འཐུས་མི་སན་ཐ་ཁྲེན་གྱིས་ཐའེ་ལྦན་ནང་དཔལ་འབྱོར་གྱི་གནས་སྟངས་ཉམ་རྒུད་ཕྱིན་མིན་ལ་མ་ལྟོས་པར་མང་ཚོགས་ཀྱིས་རྒྱུ་མཚན་མེད་པའི་ཐོག་ནས་གཞུང་འཛིན་ཚོགས་པར་རེ་བ་ཆེན་པོ་བྱེད་བཞིན་ཡོད་སྐོར་འགྲེལ་བརྗོད་བྱས་འདུག།  ད་རེས་ཁ་སྐོང་འོས་བསྡུའི་ནང་ཐའེ་ལྦན་དམངས་གཙོ་ཡར་ཐོན་ཚོགས་པར་རྒྱལ་ཁ་ཐོབ་པ་དེས་ཚོགས་པའི་བློ་སྟོབས་འཕེལ་ནས་སྲིད་འཛིན་ མ་ཡིང་ཇུ་ལ་སྐྱོན་བརྗོད་བྱེད་ཤུགས་ཆེ་རུ་གཏོང་རྒྱུའི་ཆ་རྐྱེན་ཆགས་སྲིད་པ་ཞིག་རེད།

སྔ་ལོ་ཕྱི་ཟླ་༨པའི་ནང་ཐའེ་ལྦན་ཁུལ་མཚོ་རླུངས་དྲག་པོ་མོ་ར་ཀོཏ་ཞེས་པ་དེ་རྒྱབ་ནས་ཡུལ་མི་༧༠༠ཙམ་ལ་སྲོག་སྐྱོན་གྱི་གནས་ཚུལ་བྱུང་རྗེས་ སྲིད་འཛིན་མ་ཡིང་ཇུ་ལ་མང་ཚོགས་ཀྱི་རྒྱབ་སྐྱོར་བྱེད་ཤུགས་ཆུང་དུ་ཕྱིན་ནས་ མང་ཚོགས་ཀྱི་བསམ་ཚུལ་བསྡུ་ལེན་བྱས་པའི་ནང་ད་ཆ་ཁོང་ལ་རྒྱབ་སྐྱོར་བྱེད་མཁན་བརྒྱ་ཆ་༢༠དང་༣༠བར་ལ་མ་གཏོགས་མེད་པ་རེད། མ་ཡིང་ཇུ་ཡིས་ཐོག་མར་སྲིད་འཛིན་གྱི་མཚན་གནས་བཞེས་སྐབས་ཁོང་ལ་རྒྱབ་སྐྱོར་ཞུ་མཁན་མང་ཚོགས་བརྒྱ་ཆ་༦༠ལྷག་ཡོད་པ་རེད།།