དགའ་ལྡན་ཕོ་བྲང་གིས་ཆོས་ལུཊ་འདྲ་མིན་གྱི་ལྷན་ཚོཊ་གནང་བ།

• 
  2014-09-22

དུས་རབས་༢༡འདི་བཞིན་ཞི་བདེ་ལྡན་པའི་དུས་རབས་ཤིག་ཏུ་བསྐྲུན་རྒྱུའི་ཆེད་དུ་དཀའ་རྙོག་རྣམས་གྲོས་མོལ་གྱི་ལམ་ནས་སེལ་ཐབས་གནང་དགོས།
དེ་ཡང་ཟླ་བ་འདིའི་ཚེས་༢༠དང་༢༡བཅས་ཉིན་གྲངས་གཉིས་རིང་དགའ་ལྡན་ཕོ་བྲང་ཡིག་ཚང་གིས་གོ་སྒྲིག་འོག་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་Hyattགསོལ་མགྲོན་ཁང་ནང་རྒྱ་གར་ནང་ཆོས་ལུགས་འདྲ་མིན་གྱི་ལྷན་ཚོགས་A Meeting of Diverse་Spiritual Traditions in Indiaཞེས་བ་ཚོགས་ཡོད་པ་དང་། ལྷན་ཚོགས་དབུ་འབྱེད་ཀྱི་སྔོན་འགྲོའི་མཛད་སྒོ་གྲུབ་རྗེས་༧གོང་ས་སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། ཆོས་གྲོགས་ཕོ་མོ་རྣམ་པ་ལྷན་རྒྱས་ནས་ལྷན་ཚོགས་འདིར་ཆེད་ཕེབས་གནང་བར་ཡི་རང་བསྔགས་བརྗོད་དང་བཀའ་དྲིན་ཆེ་ཞུ་རྒྱུ་ཡིན། ངོས་རང་འགྲོ་བ་མི་ཞིག་ཡིན་པའི་ཆ་ནས་ཡ་རབས་བཟང་སྤྱོད་གོང་འཕེལ་གཏོང་ཐབས་དང་། ངོས་རང་ཉིད་ཆོས་པ་ཞིག་ཡིན་པའི་ཆ་ནས་ཆོས་ལུགས་ཕན་ཚུན་དབར་འཆམ་མཐུན་དང་བརྩི་བཀུར་ཡོང་ཐབས། བོད་མི་ཞིག་ཡིན་པའི་ཆ་ནས་བོད་རིགས་ཀྱི་བདེ་དོན་ལ་ལྟ་སྐྱོང་བྱེད་རྒྱུ་བཅས་ནི་དོར་དུ་མི་རུང་བའི་ངོས་ཀྱི་ལས་འགན་ཞིག་ཆགས་ཡོད་ཅེས་བཀའ་གནང་བ་དང་།  གཞི་རྩའི་ཆ་ནས་ང་ཚོ་ཚང་མ་འགྲོ་བ་མི་ཞིག་ཡིན་པ་མ་ཟད། སྤྱི་ཚོགས་ལ་བརྟེན་དགོས་པའི་སེམས་ཅན་ཞིག་ཡིན་གཤིས།  ང་ཚོ་ཚང་མ་འཚོ་གནས་ཆེད་དུ་ཕན་ཚུན་གཅིག་གི་གཅིག་ལ་བརྟེན་དགོས་པ་ཞིག་ཆགས་ཡོད་ལ་ང་ཚོ་ཚང་མ་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་ཆགས་ཡོད་སྟབས། ང་ཚོ་ཚང་མས་བྱམས་བརྩེ་དང་སྙིང་རྗེ། གཞན་ཕན་གྱི་ཐོག་ལ་བསམ་བློ་ཤུགས་ཆེ་ཙམ་གཏོང་དགོས་པའི་དུས་ལ་བསླེབས་ཡོད། དུས་རབས་ ༢༠ པའི་ནང་མི་གསོད་ཁྲག་སྦྱོར་གྱི་རྐྱེན་པས་མི་གྲངས་ས་ཡ་ ༢༠༠ ཙམ་འདས་གྲོངས་སུ་གྱུར་ཡོད་པའི་ཚོད་དཔག་བྱེད་བཞིན་ཡོད། དུས་རབས་ ༢༡ འདི་བཞིན་ཞི་བདེ་ལྡན་པའི་དུས་རབས་ཤིག་ཏུ་བསྐྲུན་རྒྱུའི་ཆེད་དུ་དཀའ་རྙོག་རྣམས་གྲོས་མོལ་གྱི་ལམ་ནས་སེལ་ཐབས་གནང་དགོས། ང་ཚོར་རང་བཞིན་ལྷན་སྐྱེས་ཀྱི་བྱམས་བརྩེ་དང་། སྙིང་རྗེ། གཞན་ཕན་བཅས་གོང་འཕེལ་གཏོང་ཐུབ་པའི་ནུས་པ་ཡོད། སྤྱིར་ཆོས་ལུགས་དང་མི་རིགས་སོགས་ཀྱི་དབར་རང་རང་གི་མོས་པ་དང་བསྟུན་པའི་ལྟ་གྲུབ་ཀྱི་ཁྱད་པར་ཡོང་གི་ཡོད་ནའང་། དམིགས་ཡུལ་དེ་བདེ་བ་འདོད་མཁན་གཅིག་མཚུངས་ཡིན་པར་བརྟེན། བསམ་བློ་རྒྱ་ཆེ་ས་ནས་བཏང་སྟེ་འཛམ་གླིང་ཞི་བདེའི་ཆེད་ཕྱག་ལས་གནང་དགོས་ལ་ཆོས་ལུགས་ཕན་ཚུན་དབར་དང་། ཆོས་ལུགས་ནང་ཁུལ་གྱི་མི་མཐུན་པའི་གནད་དོ་ན་ཁག་ཞི་བའི་ལམ་ནས་སེལ་ཐབས་བྱེད་དགོས་ཀྱི་རེད་བསམ་གྱི་ཡོད་ཅེས་བཀའ་གནང་རྗེས་མཛད་སྒོའི་སྐུ་མགྲོན་གཙོ་བོ་རྒྱ་གར་གྱི་རྒྱལ་སའི་སྲིད་སྐྱོང་Najeeb Jungམཆོག་གིས་བོད་ཀྱི་༧སྐྱབས་མགོན་ཏཱ་ལའི་བླ་མ་མཆོག་སྐུ་སྒེར་གྱི་ངོས་ནས་ཐུགས་འཁུར་ཆེ་བཞེས་ཐོག་ཆོས་ལུགས་ཕན་ཚུན་མཐུན་སྒྲིལ་གྱི་ལྷན་ཚོགས་འདི་ལྟ་བུ་གོ་བསྒྲིགས་ཞུས་པར་རྗེས་སུ་ཡི་རང་ཞུ་རྒྱུ་མ་ཟད། འཛམ་གླིང་འདིའི་སྟེང་མིའི་སྤྱི་ཚོགས་ཀྱི་དཀའ་ངལ་སེལ་ཐབས་དང་ཆོས་ལུགས་ཕན་ཚུན་དབར་འཆམ་མཐུན་ཡོང་ཐབས་གནང་ཐུབ་མཁན་སྐུ་ཉིད་མཆོག་ལས་གཞན་འོས་ཤིང་འཚམ་པ་ཞིག་མེད་སྟབས། ལྷན་ཚོགས་འདི་བཞིན་དོན་དང་ལྡན་པ་ཞིག་ཡོང་བའི་སྨོན་འདུན་ཞུ་རྒྱུ་ཡིན་ཞེས་གསུང་བཤད་གནང་ཡོད་པ་རེད།    

གསར་འགོད་པ་འབེན་པ་སྟོབས་རྒྱལ།