སྲིད་སྐྱོང་དང་ཚོཊ་གཙོས་རྒན་བདག་རྣམ་པར་གསུང་བཤད་གནང་བ།

• 
  2016-04-14

དེང་སྐབས་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་མདུན་ལམ་སློབ་སྟོན་ཚན་པས་གོ་བསྒྲིགས་འོག། གཏན་ཉིན་སློབ་གྲྭ་ཁག་གི་རྒན་བདག་རྣམས་ལ་འགོ་ཁྲིད་ཀྱི་ཟབ་སྦྱོང་ཐེངས་བཞི་བ་གནང་བཞིན་ཡོད་པར་སོང༌། ཕྱི་ཚེས་༡༤་ཉིན་ཟབ་སྦྱོང་ནང་མཉམ་ཞུགས་གནང་མཁན་ཚོར་སྲིད་སྐྱོང་བློ་བཟང་སེངྒེ་མཆོག་དང་། སྤྱི་འཐུས་ཚོགས་གཙོ་སྤེན་པ་ཚེ་རིང་རྣམ་གཉིས་ཀྱིས་བཙན་བྱོལ་བོད་མིའི་འཛིན་སྐྱོང་དང་མང་གཙོའི་འཕེལ་རིམ་བཅས་པའི་ཐད་གསུང་བཤད་གནང་འདུག
དབུས་བོད་མིའི་སྒྲིག་འཛུགས་ཀྱིས་གནས་ཚུལ་སྤེལ་བའི་ནང། སྐབས་དེར་སྲིད་སྐྱོང་མཆོག་གིས་བཙན་བྱོལ་བོད་མིའི་སྒྲིག་འཛུགས་སྲ་བརྟན་དགོས་པའི་གལ་གནད་དང༌། ཤེས་ཡོན་སྲིད་བྱུས། བོད་པའི་སློབ་ཕྲུག་རྣམས་ལ་སློབ་ཡོན་སྤྲོད་ཕྱོགས། བོད་རྒྱ་ཞི་མོལ་གྱི་གནས་སྟངས་དང་ཆ་རྐྱེན། དབུ་མའི་ལམ་གྱི་སྲིད་བྱུས་བཅས་པའི་ཐད་གསུང་བཤད་གནང་བའི་ནང་ནས། བོད་དོན་བདེན་མཐའ་གསལ་རྒྱུའི་གནད་དོན་གཙོ་བོ་བོད་རྒྱ་ཞི་མོལ་ལ་རག་ལུས་ཡོད། ནམ་ཞིག་བོད་དོན་དེ་ཉིད་བདེན་མཐའ་གསལ་ངེས་ཡིན། ཡིན་ནའང་ཇི་སྲིད་བོད་དོན་བདེན་མཐའ་མ་གསལ་གྱི་བར་བཙན་བྱོལ་སྒྲིག་འཛུགས་འདི་སྲ་བརྟན་དགོས་པ་གལ་ཆེན་རེད་ཅེས་དང༌། ཡང་དབུ་མའི་ལམ་གྱི་སྲིད་བྱུས་དེ་ང་ཚོས་ཁ་ཡོད་ལག་ཡོད་དང་ཡིད་ཆེས་ལག་བསྟར་བྱེད་རྒྱུའི་སྲིད་བྱུས་ཤིག་རེད། སྲིད་བྱུས་དེར་དོན་འབྲས་སོན་ཐབས་སུ་རྒྱ་ནག་མཉམ་ཕན་ཚུན་བསམ་ཤེས་དང་ཡིད་ཆེས་བསྐྲུན་ཐུབ་པ་བྱ་རྒྱུ་གལ་ཆེན་པོ་ཡིན་པ་བཅས་ཀྱི་བཀའ་སློབ་གནང་འདུག
ཡང་ཉིན་དེ་རང་དུ་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་ཟབ་སྦྱོང་ལ་མཉམ་ཞུགས་གནང་མཁན་ཚོར་བཙན་བྱོལ་བོད་མིའི་མང་གཙོའི་འཕེལ་རིམ་དང་བོད་ནང་གི་གནས་སྟངས་སོགས་ཀྱི་སྐོར་ལ་གཏམ་བཤད་གནང་ཡོད་པ་རེད།
གསུང་བཤད་གནང་ཡོད་པ་རེད།།  

གསར་འགོད་པ་ངག་དབང་ཆོས་འཕེལ།