བོད་ཀྱི་དཀའ་རྙོག་སེལ་ཐབས་ལ་རྒྱབ་སྐྱོར་གནང་རྒྱུའི་འབོད་སྐུལ།
དབུ་མའི་ལམ་གྱི་ཐོག་ནས་བོད་ཀྱི་དཀའ་རྙོག་སེལ་ཐབས་ལ་རྒྱབ་སྐྱོར་གནང་རོཊ་ཞེས་སྲིད་སྐྱོང་མཆོག་གིས་ནིའུ་ཛ་ལན་ཊི་ནས་འབོད་སྐུལ་གནང་འདུག
-
2017-05-01 -
-
-
Your browser doesn’t support HTML5 audio
དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་དབུ་མའི་ལམ་གྱི་ཐབས་ལམ་ཐོག་ནས་བོད་ཀྱི་དཀའ་རྙོག་སེལ་ཐབས་སུ་ནིའུ་ཛ་ལན་ཊི་མི་མང་ངོས་ནས་རྒྱབ་སྐྱོར་གནང་རྒྱུའི་འབོད་སྐུལ་ཞུས་གནང་འདུག
དེ་ཡང་སྲིད་སྐྱོང་བློ་བཟང་སེང་གེ་མཆོག་ཐོག་མར་ཨོ་སི་ཀྲོ་ལི་ཡ་དང་། དེ་ནས་ཚེས་༣༠་ཉིན་ནིའུ་ཛ་ལན་ཊི་ནང་གཞུང་དོན་འཚམས་གཟིགས་ཕེབས་འབྱོར་བྱུང་ཡོད་པ་མ་ཟད། ཁུལ་དེའི་ New Zealand Herald སོགས་གསར་འགྱུར་བརྒྱུད་ལམ་ཁག་གི་བཅར་འདྲི་དང་ལེན་སྐབས། ནིའུ་ཛ་ལན་ཊི་དེ་སྔ་རྒྱལ་ཁབ་གཞན་གྱི་རྒྱབ་སྐྱོར་ཐོག་ནས་མང་གཙོ་དང་འགྲོ་བ་མིའི་ཐོབ་ཐང་གི་གཞི་རྩའི་རང་དབང་ཡོང་ཐབས་གནང་ཡོད་པ་ལྟར། ང་ཚོའི་ངོས་ནས་ཀྱང་བོད་ནང་རང་སྐྱོང་གི་གནས་བབ་ཅིག་དང་། བོད་མི་ཚོར་གཞི་རྩའི་ཐོབ་ཐང་ཡོང་ཐབས་སུ་རྩོད་ལེན་བྱེད་ཀྱི་ཡོད། ངོས་རང་འདིར་ཡོང་ནས་མི་དམངས་ཀྱི་རྒྱབ་སྐྱོར་འཚོལ་ཐབས་བྱེད་བཞིན་ཡོད་པས་ནིའུ་ཛ་ལན་ཊི་མི་མང་རྣམས་ནས་ང་ཚོར་རྒྱབ་སྐྱོར་གནང་རོགས་གནང་ཞེས་འབོད་སྐུལ་ཞུས་འདུག
དེ་དང་ཕྱོགས་མཚུངས་སྲིད་སྐྱོང་མཆོག་གིས་བོད་ནང་གི་གནས་སྟངས་སྤྱི་དང་། ལྷག་པར་དུ་ད་ལྟའི་དུས་ཚོད་འདིར་གསེར་རྟ་བླ་རུང་སྒར་ལ་ཆ་བཞག་ན་རྒྱ་ནག་གཞུང་ནས་ནང་ཆོས་སློབ་གཉེར་ཁང་དེའི་ནང་དགེ་འདུན་དང་བཙུན་མ་ཆིག་ཁྲི་ཉིས་སྟོང་ཙམ་ཡོད་པ་ནས་ལྔ་སྟོང་མ་གཏོགས་ཆོས་སྒར་ནང་སྡོད་མི་ཆོག་པའི་བཙན་བཀའ་བཏང་ནས་དགེ་བཙུན་རྣམས་ཕྱིར་འབུད་དང་མ་འོངས་པར་བསྐྱར་དུ་ལོག་མི་ཆོག་པ། གྲྭ་ཤག་གཏོར་བཤིག་བཏང་བ་སོགས་ཀྱི་གནས་སྟངས་མི་བཟོད་པར་བཙུན་མ་འགའ་ཤས་རང་སྲོག་བཅད་པའི་གནས་ཚུལ་བྱུང་ཡོད་པ་བཅས་གང་ལྟར་རྒྱ་ནག་གཞུང་ནས་བོད་ནང་གི་བོད་མི་ཚོར་སྡུག་སྦྱོང་ཚད་མེད་བཏང་དང་གཏོང་བཞིན་པའི་དཀའ་སྡུག་ལ་བཟོད་མེད་ཀྱིས། ད་བར་སྔ་རྗེས་སུ་བོད་མི་ཁྱོན་བསྡོམས་༡༤༨་ཙམ་ནས་རང་ལུས་མེར་སྲེགས་བཏང་བའི་གནས་ཚུལ་བྱུང་ཡོད་པ་སོགས་ངོ་སྤྲོད་གནང་ནས་བོད་ཀྱི་དཀའ་རྙོག་སེལ་ཐབས་སུ་དབུ་མའི་ལམ་གྱི་ཐབས་ལམ་གྱི་ཐོག་ནས་རྒྱ་ནག་གཞུང་དང་གྲོས་མོལ་གནང་རྒྱུ་ནི་གལ་ཆེན་པོར་ངོས་འཛིན་གནང་གི་ཡོད་པའི་སྐོར་གསུངས་འདུག
སྲིད་སྐྱོང་བློ་བཟང་སེང་གེ་མཆོག་གིས་New Zealand དུ་ཉིན་བཞིའི་རིང་གི་མཚམས་གཟིགས་རིང་། ཡུལ་དེའི་གྲོང་ཁྱེར་ Auckland དང་། Dunedin བཅས་ཀྱི་ནང་མི་དམངས་ལ་གཏམ་བཤད་གནང་རྒྱུ་དང་། དེ་བཞིན་གྲོས་ཚོགས་ཀྱི་ཆབ་སྲིད་མི་སྣ་དང་མཇལ་འཕྲད་གནང་རྒྱུ་སོགས་ཀྱི་མཛད་འཆར་ཡོད་འདུག།
གསར་འགོད་པ་རིག་འཛིན་ཆོས་སྒྲོན་དང་། གུ་རུ་ཆོས་སྐྱིད།