བལ་ཡུལ་སྲོང་བཙན་སློབ་གྲྭར་བཙན་གཡེམ་དང་དགེ་ཆེ་ཕྱིར་འབུད།

• 
  2014-06-23

བལ་ཡུལ་བོད་ཀྱི་སྲོང་བཙན་སློབ་གྲྭའི་དགེ་ཆེ་ཡིས་སློབ་གྲྭའི་བུ་མོ་ཁག་ཅིག་ལ་བཙན་གཡེམ་བྱས་བར་ཉེན་རྟོག་པས་འཇུ་བཟུང་བྱས་འདུག
དེ་ཡང་འདི་གའི་གསར་འགོད་པ་ཐུབ་བསྟན་སངས་རྒྱས་ཀྱིས་གནས་ཚུལ་བཏང་དོན། བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ཀྱི་ཁོངས་གཏོགས་ཡིན་པའི་བལ་ཡུལ་གྱི་མཆོད་རྟེན་བྱ་རུང་ཁ་ཤོར་ཆེན་མོའི་ཁུལ་དུ་ཡོད་པའི་སྲོང་བཙན་སློབ་གྲྭའི་དགེ་ཆེ་མ་ཧེ་ཞིས་ཐཱ་པ་Mahesh Thapaཡིས་སློབ་གྲྭའི་བུ་མོ་ཁག་ཅིག་ལ་ཚུལ་མིན་བྱ་སྤྱོད་སྤེལ་བ་དང་། བཙན་གཡེམ་བྱས་བའི་གནས་ཚུལ་བྱུང་རྗེས། སློབ་གྲའི་འགན་འཛིན་ལྷན་ཚོགས་ཚོགས་འདུ་འཚོགས་ནས། ཁོང་སློབ་གྲྭ་ནས་གནས་དབྱུང་ཕྱིར་འབུད་བཏང་ཡོད་པ་དང་། སློབ་སྤྱི་བྱམས་པ་ཕུན་ཚོགས་ལགས་ཀྱིས་དོན་རྐྱེན་དེའི་ཐད་མུ་མཐུད་དུ་ཞིབ་འཇུག་བྱེད་རྒྱུ་ཡིན་པ་བརྗོད་འདུག
གནས་ཚུལ་ལྟར་ན། སློབ་གྲ་དེའི་སློབ་མ་བུ་མོ་བདུན་བརྒྱད་ཞིག་གིས་དགེ་ཆེ་མ་ཧེ་ཞིས་ཐཱ་པ་ ཡིས་ཁོང་རྣམས་ལ་བཙན་གཡེམ་བཏང་སོང་ཞེས་དཔང་བོ་ཐོན་གྱི་ཡོད་པ་དང་། ཁོང་ཚོའི་ཁྲོད་ཀྱི་ལོ་ན ༡༤ ཅན་གྱི་བུ་མོ་ཞིག་གི་ཨ་ཕས་བརྗོད་དོན། སློབ་གྲྭའི་དགེ་ཆེ་མ་ཧེ་ཞིས་ཐཱ་པ་ ཡིས་ཁོང་གི་བུ་མོ་ཟ་ཁང་བོས་བ་དང་དགོང་མོ་མགྲོན་ཁང་ལ་ཁྲིད་པ་སོགས་ཀྱི་གནས་ཚུལ་བྱུང་ཡོད་པ་འགྲེལ་བརྗོད་བྱས་འདུག སློབ་གྲའི་དེའི་དགེ་ཆེ་མ་ཧེ་ཞིས་ཐཱ་པ་ཡིས་སྲོང་བཙན་སློབ་གྲྭའི་ནང་འདས་བའི་མི་ལོ་ཉི་ཤུ་ལྷག་གི་རིང་དགེ་རྒན་བྱས་མྱོང་པ་དང་། ཟླ་འདིའི་ཚེས ༢༣ ཉིན་བཙན་གཡེམ་གྱི་གནས་ཚུལ་དང་འབྲེལ་ནས་ཁོང་བལ་ཡུལ་གྱི་ཉེན་རྟོག་པས་འཛིན་བཟུང་བྱས་འདུག
གོང་གི་སྲོང་བཙན་བལ་བཟའ་གཏན་ཉིན་འབྲིང་རིམ་སློབ་གྲྭ་ནི། བལ་ཡུལ་དོན་གཅོད་རིན་ཆེན་དར་ལོ་ལགས་ཀྱིས་ཐུགས་ཁུར་འོག་ཕྱི་ལོ་༡༩༨༢ ཕྱི་ཟླ་༣ ཚེས་༢༨ ཉིན་འགོ་འཛུགས་གནང༌བ་དང་། ༡༩༨༥ ཡས་མས་སུ་གཏན་སློབ་ཀྱི་ངོ་བོར་དེབ་སྐྱེལ་ཞུས་ཏེ་བལ་ཡུལ་གཞུང་གི་ཤེས་རིག་ལས་ཁུངས་དང་། བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་ཁོངས་སུ་ཡོད་པ་རེད།

གསར་འགོད་པ་དཔལ་ལྡན་རྒྱལ།

གནས་ཚུལ་ཞིབ་ཕྲ་འདི་གའི་གསར་འགོད་པ་ཐུབ་བསྟན་སངས་རྒྱས་ལགས་ཀྱིས་ས་གནས་བཏང་བར་གསན་རོགས༎

 

གསར་འགོད་པ་ཐུབ་བསྟན་སངས་རྒྱས།