ཨ་རིའི་སྲིད་འཛིན་ནས་འབར་མའི་གཞུང་ལ་གནོན་ཤུགས།

• 
  2009-05-27

༄༅༎ཨ་མི་རི་ཀའི་སྲིད་འཛིན་ཨོ་སྦ་མ་མཆོག་གིས་མང་གཙོ་དོན་གཉེར་བ་ལྕམ་ཨོང་སན་སུའུ་ཆི་མཆོག་བཟང་བཙོན་ནམ་དོ་དམ་བཀག་ཉར་འོག་ནས་མྱུར་དུ་གློད་བཀྲོལ་གཏོང་དགོས་ཞེས་ཨ་མི་རི་ཀའི་གཞུང་ནས་འབར་མའི་དྲག་པོའི་གཞུང་ལ་གནོན་ཤུགས་སྤྲད་གནང་ཡོད་པ་རེད།

ལྕམ་ཨོང་སན་སུའུ་ཆི་ནི་ད་དུང་མུ་མཐུད་ཕྱི་ཕྱོགས་དང་འབྲེལ་བ་བྱེད་དུ་མི་འཇུག་པར་ཁེར་རྐྱང་གི་ཐོག་ནས་བཟང་བཙོན་འམ་དོ་དམ་བཙོན་འཇུག་འོག་གནས་མུས་ཡིན་པ་དེའི་ཐོག་རྒྱལ་སྤྱིའི་སྤྱི་ཚོགས་ཀྱི་འཐུས་མི་ཁག་ནས་འགན་འཁུར་ཆེ་བཞེས་ཀྱིས་འབར་མའི་དྲག་པོའི་གཞུང་གི་ཚབས་ཆེའི་བྱེད་སྟངས་དེའི་ཐད་དཔང་རྟགས་གནང་དགོས་ཀྱི་རེད་ཅེས་ཨ་མི་རི་ཀའི་སྲིད་འཛིན་ཨོ་སྦ་མ་མཆོག་གིས་རྒྱལ་སྤྱིའི་ནང་འབོད་སྐུལ་གནང་ཡོད་པ་རེད། ཡང་སྲིད་འཛིན་ཨོ་སྦ་མ་མཆོག་གིས་འབར་མའི་དྲག་པོའི་གཞུང་གིས་མང་གཙོ་དོན་གཉེར་བ་ལྕམ་ཨོང་སན་སུའུ་ཆི་མཆོག་ལ་ཇི་ལྟར་དྲག་གནོན་བྱེད་མིན་ལ་མ་ལྟོས་པར་ལྕམ་ཨོང་སན་སུའུ་ཆི་ནས་ད་དུང་མུ་མཐུད་བློ་སྟོབས་ཆེན་པོས་འབར་མའི་ནང་མང་གཙོའི་ལས་དོན་གཉེར་བཞིན་པར་བསྔགས་བརྗོད་གནང་བ་དང་ཕྱོགས་མཚུངས་འབར་མའི་དྲག་པོའི་སྲིད་གཞུང་གིས་ལྕམ་ཨོང་སན་སུའུ་ཆི་དང་དེ་བཞིན་བཙོན་འཇུག་བྱེད་བཞིན་པའི་མང་གཙོའི་དོན་གཉེར་བ་རྣམས་མྱུར་དུ་གློད་བཀྲོལ་གཏོང་དགོས་པའི་འབོད་སྐུལ་ཡང་གནང་ཡོད་པ་རེད།