བཀའ་བློན་ཁྲི་པ་མཆོག་ནས་ལྕམ་ནེན་སི་པེ་ལོ་སིར་ཐུགས་གསོ།

• 
  2010-11-03

༄༅༎ཨ་རིའི་གྲོས་ཚོགས་འཐུས་མིའི་འོས་འདེམས་ནང་གྲོས་ཚོགས་འོག་མའི་འཐུས་མིའི་འོས་བསྡུའི་ནང་མང་གཙོ་ཚོགས་པར་ཕམ་ཉེས་བྱུང་ནས་གྲོས་ཚོགས་ཀྱི་ཚོགས་གཙོའི་ཞབས་བསྟེགས་ཤོར་བའི་གནས་སྟངས་ཐོག་ བཙན་བྱོལ་བོད་གཞུང་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་ནས་གྲོས་ཚོགས་ཀྱི་ཚོགས་གཙོ་ལྕམ་ནེན་སི་པེ་ལོ་སི་མཆོག་ལ་ཐུགས་གསོའི་འཚམས་དྲིན་ཞིག་ཕུལ་ཡོད་པ་དང་ དེའི་ནང་ད་རེས་ཀྱི་ཨ་རིའི་འོས་བསྡུའི་བར་མའི་འབྲས་བུ་དེ་བཞིན་ཐ་མའི་འབྲས་བུ་ཞིག་ཡིན་པར་ཁྱེད་ཀྱི་དགོངས་པ་བཞེས་ཀྱི་མེད་པར་ཡིད་ཆེས་ཞུ་ཡི་ཡོད་  འོས་བསྡུའི་གྲུབ་འབྲས་དེ་བཞིན་ཨ་རིའི་མི་མང་གི་རྒྱལ་ཁ་དང་གཡོ་འགུལ་ལྡན་པའི་ཨ་རིའི་དམངས་གཙོའི་ཁྱད་ཆོས་མཚོན་ཐུབ་ཀྱི་ཡོད་པ་དང་ འདིར་ང་ཚོས་ཁྱེད་ནས་འདས་པའི་ལོའི་ནང་ཨ་རིའི་མི་མང་ཚོར་ཞབས་ཞུ་གནང་བར་ཐུགས་རྗེ་ཆེ་ཞུ་རྒྱུ་མ་ཟད་གོ་སྐབས་འདི་དང་བསྟུན་ནས་ཁྱེད་ནས་༧གོང་ས་སྐྱབས་མགོན་ཆེན་པོ་མཆོག་གི་འཚེ་མེད་ཞི་བའི་ཐབས་ལམ་གྱི་དགོངས་ཚུལ་ལ་རྒྱབ་སྐྱོར་གནང་བ་མ་ཟད་  བོད་ཀྱི་གནད་དོན་ཐོག་བོད་མི་ཚོར་རྒྱབ་སྐྱོར་ཆེད་ཉིས་སྟོང་བརྒྱད་ལོར་ཆེད་བསྔགས་བཞུགས་སྒར་དུ་ཕེབས་གནང་བའི་གནས་སྟངས་ད་ལྟ་ཡང་དྲན་པ་གསལ་པོ་འདུག དེར་བརྟེན་ཁྱེད་ཀྱིས་བོད་དོན་ཐོག་ལྷད་མེད་ཀྱིས་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་ཡིན་སོགས་བཀོད་གནང་ཡོད་འདུག།